Місія Аб'яднанага пераходнага кабінета адкрыецца ў Бруселі. Будынак беларускім дэмсілам перадалі бясплатна

Урад Фландрыі сёння перадаў Святлане Ціханоўскай будынак у Бруселі, дзе з гэтага часу будзе працаваць місія Аб’яднанага пераходнага кабінета. Ціханоўская падпісала неабходныя паперы і бясплатна атрымала ключы ад памяшкання, паведамляе «Позірк».

Сёння ў гэтым памяшканні адбылося і першае мерапрыемства — сустрэча з дыяспарай. Але ўвогуле пакуль што памяшканне закрыта для наведванняў, адкрыццё адбудзецца ў бліжэйшы месяц-два.

Кіраваць офісам прызначаны Уладзімір Астапенка, намеснік прадстаўніка па міжнародных адносінах Аб'яднанага пераходнага кабінета і адзін з кіраўнікоў Нацыянальнага антыкрызіснага ўпраўлення.

Аб'яднаны пераходны кабінет быў створаны па ініцыятыве Святланы Ціханоўскай 9 жніўня. Адразу ў яго з рознымі профільнымі паўнамоцтвамі ўвайшлі Валерый Кавалеўскі, Павел Латушка, Валерый Сахашчык і Аляксандр Азараў. Каманда кабінета ад той пары пашыраецца.