На волю выйшаў палітвязень Мікалай Аўтуховіч (+фота)

З гродзенскай турмы №1 палітвязень выйшаў каля 8-й гадзіны раніцы. Сустракаць яго пад сценамі  турмы сабраліся блізкія, палітычныя актывісты і журналісты — агулам каля 30 чалавек. У турме яму двойчы прапаноўвалі пісаць прашэнне аб памілаванні на імя Лукашэнкі. Палітвязень адмовіўся, каб не чуць потым здзекі пра сваю "слабасць".



Аўтуховіч паведаміў, што найперш хоча адпачыць пасля турмы. Аднак яшчэ сёння ён хоча здаць у шпіталі аналізы, каб даведацца пра свой стан здароўя.

Таксама ў бліжэйшых планах экс-палітвязня — высветліць сітуацыю з Саюзам афганцаў і працягнуць працу па яго стварэнні.

Мікалай Аўтуховіч распавёў журналістам, што за час зняволення яму прыйшло 2292 лісты. Прычым апошні з іх аддалі ў дзень вызвалення, 8 красавіка.

Нагадаем, што ваўкавыскі прадпрымальнік правёў за кратамі пяць гадоў. У 2009 годзе Вярхоўны суд прызнаў яго вінаватым ў незаконным захоўванні некалькіх патронаў.

Карэспандэнт Еўрарадыё пагутарыў з Мікалаем Аўтуховічам у першыя хвіліны пасля вызвалення. Падрабязнасці неўзабаве — у вялікім інтэрв'ю на сайце Еўрарадыё

.