Спыніць крымінальную справу ў дачыненні да Фядыніча і Комліка!

Рух «За Свабоду», «Беларуская хрысціянская дэмакратыя», Беларуская сацыял-дэмакратычная партыя (Грамада) і Аб’яднаная грамадзянская партыя выступілі адмысловай заявай наконт пераследзу прафсаюза радыёэлектроннай прамысловасці.

“30 ліпеня пачнецца судовы працэс над лідарамі прафсаюза РЭП Генадзем Фядынічам і Ігарам Комлікам. Ён звязаны з надуманымі абвінавачаннямі ў нясплаце падаткаў. Падобная практыка ўладамі раней выкарыстоўвалася ў адносінах да праваабарончага цэнтру «Вясна» і яго кіраўніка Алеся Бяляцкага”, — нагадваецца ў заяве.
У сувязі з гэтым Рух “За Свабоду”, БХД, БСДП (Грамада) і АГП заявілі пра заказны палітычны характар крымінальная справа ў дачыненні да лідараў Беларускага прафесійнага саюза работнікаў радыёэлектронная прамысловасці. Бо яна “пераследуе мэту паралізаваць працу прафсаюза РЭП, які найбольш актыўна выступае ў абарону сацыяльна-эканамічных праў беларусаў і аказвае рэальную дапамогу ў аднаўленні парушаных правоў”.
 
”Адвольнае выкарыстанне крымінальнага заканадаўства з мэтай пераследу палітычных апанентаў з’яўляецца недапушчальным і вяртае Рэспубліку Беларусь у эпоху таталітарызму. Інстытуты грамадзянскай супольнасці павінны падтрымлівацца дзяржавай, а не знішчацца за сваю незалежную і прынцыповую пазіцыю. Без моцнай грамадзянскай супольнасці немагчымыя дэмакратычныя змены ў краіне” — нагадваецца ў заяве.
Рух “За Свабоду”, БХД, БСДП (Грамада) і АГП патрабуюць “неадкладна спыніць крымінальную справу ў дачыненні да Генадзя Фядыніча і Ігара Комліка, а іх правы аднавіць у поўным аб’ёме. Асоб, вінаватых ў неправавых дзеяннях па пераследу лідараў незалежнага прафсаюза, неабходна прыцягнуць да адказнасці”.