Украінскі эксперт: «Лукашэнка ў чарговы раз кіне Пуціна»

Украінскі паліттэхнолаг, эксперт-міжнароднік Барыс Тызенгаузен звярнуў увагу на важныя мэсэджы ў выступе Лукашэнкі на Дзень Перамогі.

— Я б на іх звярнуў увагу, таму што Лукашэнка — гэта такі хітры палітычны флюгер. Ён тонка адчувае, што адбываецца ў Расіі, у яго ёсць інсайдэрская інфармацыя, таму што ён часта там бывае. І ў залежнасці ад гэтага ён мяняе сваю рыторыку, — цытуе Тызенгаўзена «Салідарнасць» са спасылкай на тэлеканал «Украіна 24». — Вось пара момантаў з апошняга выступу Лукашэнкі. «Я спадзяюся, мы будзем жыць у бліжэйшы час у новым свеце без санкцый», — сказаў ён. Гэта значыць, яму балюча ад санкцый, і гэта ўжо прыкметна. Расія грошай не дасць, а больш яму браць няма адкуль. Такім чынам, ён спрабуе ратаваць сябе ў гэтай фразе.

А ў наступнай ён кажа, што давайце жыць мірна, усёй нашай вялікай сям'ёй, уключаючы і еўрапейскія дзяржавы, і што «мы зробім усё магчымае, калі раптам Украіна апынецца ў небяспецы, мы ёй падставім плячо». Зразумела, што пра небяспеку ён казаў у кантэксце гэтых міфаў, якія распаўсюджваюцца пра Польшчу ці яшчэ кагосьці, хто хоча падзяліць Украіну.

Змяненне рыторыкі беларускага кіраўніка, на думку паліттэхнолага, сведчыць аб яго гатоўнасці пайсці насуперак лініі Пуціна.

— Я думаю, што Лукашэнка ў чарговы раз кіне Пуціна. Ён рабіў гэта ўжо не раз, проста ўцячы далёка не мог. Але ў гэты раз кіне, калі гаворка зойдзе пра яго ўласную бяспеку. Нагадаю, Расія яму не дала грошай, а проста падоўжыла тэрмін вяртання крэдыту. І ён мог задумацца: а дзеля чаго ўсе гэтыя саюзныя дамовы, Расія цяпер сваю эканоміку будзе ратаваць усімі магчымымі спосабамі, а мне хто дапаможа? Ніхто не дапаможа.

І яшчэ адзін цікавы момант. Калі Пуцін абламае зубы пра Украіну, ён у сваім гэтым ментальным Савецкім Саюзе абавязкова пачне глядзець па баках у пошуках, што яшчэ можна вярнуць. Краіны Балтыі нельга, таму што яны ўсе з'яўляюцца членамі НАТА. Казахстан — дакладна не, Туркменістан, Азербайджан і г. д. — таксама не. Застаецца толькі Лукашэнка. Чаму б не далучыць Беларусь? Гэта як бы будзе і перамога, і на мяжу Еўропы можна выйсці і паставіць свае базы.

Мне здаецца, Лукашэнка ведае аб гэтым сцэнары і пабойваецца яго, — мяркуе ўкраінскі эксперт.

Хочаце ведаць больш? Сачыце за нашымі публікацыямі ў Telegram і Facebook!

  • Апошняе на сайце
,
Больш цікавага на «Новым Часе»: