23 студзеня прыхільнікі Навальнага рыхтуюць мітынгі па ўсёй Расіі

Кіраўнік сеткі рэгіянальных штабоў апазіцыянера Аляксея Навальнага Леанід Волкаў абвясціў, што ў адказ на арышт палітыка штабы пачынаюць падрыхтоўку да мітынгаў ва ўсёй Расіі. Мітынгі запланаваны на 23 студзеня.

«Штабы Навальнага ва ўсёй краіне неадкладна пачынаюць падрыхтоўку да вялікіх мітынгаў ва ўсёй краіне 23 студзеня, не чакаючы новага суда. Аляксей Навальны павінен быць неадкладна вызвалены», — цытуе Волкава «Камерсант». Ён адзначыў, што цяпер знаходзіцца ў Берліне. «Прытрымліваючыся нашых прынцыпаў, я не магу нікога нікуды заклікаць, бо я не магу выйсці на вуліцу разам з іншымі. Але, здаецца, зараз такая сітуацыя, што і заклікаць не трэба», — напісаў ён.

Спадар Навальны ў сваім звароце, запісаным у аддзяленні паліцыі ў Хімках, заклікаў людзей не баяцца ўдзельнічаць у пратэстах. Паводле яго слоў, выхад людзей на вуліцу — «гэта тая рэч, палітычны фактар якой нельга ігнараваць. Ён самы галоўны, самы важны, гэта сутнасць палітыкі. Таму не бойцеся, выходзьце на вуліцы. Выходзьце за мяне, выходзьце за сябе і за сваю будучыню».

Аляксей Навальны быў затрыманы 17 студзеня па прыбыцці ў Расію. ФСВП заяўляла, што затрыманне спадара Навальнага звязана з пазовам аб замене раней прызначанага палітыку ўмоўнага тэрміну на рэальны па справе аб крадзяжах у кампаніі «Іў Рашэ». На наступны дзень суд, пасяджэнне якога прайшло ў аддзяленні паліцыі, арыштаваў спадара Навальнага на 30 сутак.