Дасье ў карыкатурах: Беспрэцэдэнтны Вялікдзень-2020
Няма сумневаў, Вялікдзень-2020 увойдзе ў гісторыю. Сёлета каталікі, пратэстанты і праваслаўныя адзначалі яго на фоне эпідэміі, што значна паўплывала на атмасферу свята, фармат і нават рытуалы. Усё пералічанае знайшло адлюстраванне ў працах карыкатурыстаў свету.
Многім хрысціянам давялося сустракаць Вялікдзень ва ўмовах самаізаляцыі. З-за пандэміі ўлады рэкамендавалі не наведваць набажэнствы, а глядзець іх анлайн. Нават практыка падарункаў на Вялікдзень не вельмі заахвочваецца. Празмерныя меры бяспекі на Вялікдзень — тэма твора аўстрыйскага мастака Мар'яна Камінскі. Медыцынскі работнік на карыкатуры спрабуе дэзынфіцыраваць казачнага зайца з падарункамі — сімвал Вялікадня на Захадзе.
Па слядах панікі, якую эпідэмія выклікала ў прадуктовых крамах, адбылася пераацэнка прыярытэтаў велікодных падарункаў. Прынамсі, так лічаць на сайце Crteator.com. На карыкатуры выдання мужчына патрабуе ад велікоднага зайца забраць каляровыя яйкі і прынесці звычайную туалетную паперу.
Чакана, што многія мастакі спраецыравалі на нашу рэальнасць біблейскія матывы. У прыватнасці, патрабаванне трымаць дыстанцыю для прафілактыкі перадачы віруса. Ісус Хрыстос на малюнку іспанскага El Juves патрабуе ад рымскага легіянера не парушаць правілы наконт бяспечнай адлегласці.
На біблейскую тэматыку і малюнак з расійскага рэсурсу Пикабу. Яго стваральнік скарыстаўся фрагментам Бібліі пра знаходжанне Ісуса да ўваскрашэння ў пячоры, што нечым нагадвае рэжым самаізаляцыі. Калі б біблейская гісторыя адбывалася ў наш час, то паліцыя, напэўна, угледзела ў спробе Ісуса пакінуць пячору злоснае парушэнне каранціну.
Дасталася ў велікодных карыкатурах і палітыкам. Асабліва перапала Дональду Трампу, якога муха ўкусіла ляпнуць, што яшчэ да каталіцкага Вялікадня з эпідэміяй у Штатах будзе скончана. На малюнку казачны заяц, каментуючы абяцанне прэзідэнта, дзівіцца — як шмат людзей працягваюць верыць у казкі.
З іншага боку Вялікдзень-2020 давёў, што чалавецтва не губляе аптымізму нават у кепскіх умовах і насуперак усім выклікам адзначае любімае свята. Так, на малюнку амерыканскага рэсурсу Cagle суседзі здзяйсняюць рытуал разбівання велікодных яек, выконваючы неабходную паводле санітарных нормаў дыстанцыю.
