Гадавіна рэферэндуму ў Каталоніі. Пратэстоўцы перакрылі чыгунку

Прыхільнікі незалежнасці Каталоніі перакрылі чыгуначныя шляхі ў Жыроне на поўначы аўтаномнай вобласці ў рамках акцыі пратэсту, прысвечанай гадавіне правядзення рэферэндуму аб незалежнасці.



 Сотні пратэстоўцаў селі на рэйкі і заблакавалі рух хуткасных цягнікоў з Барселоны ў Парыж, а таксама перакрылі аўтамагістраль AP-7, якая праходзіць уздоўж узбярэжжа Міжземнага мора.

Акрамя таго, удзельнікі пратэсту перакрылі вуліцы, якія вядуць у цэнтральную частку Барселоны. На плошчы Каталоніі ў цэнтры горада праходзіць мітынг.

У іншых частках аўтаномнай вобласці таксама праходзяць акцыі пратэсту.

Крызіс у краіне пачаўся з моманту правядзення забароненага цэнтральнымі ўладамі і прызнанага незаконным Канстытуцыйным судом рэферэндуму аб незалежнасці Каталоніі 1 кастрычніка 2017 года.

90% каталонцаў — з тых 43% насельніцтва правінцыі, якія прыйшлі на выбарчыя ўчасткі, — прагаласавалі за незалежнасць ад Іспаніі. Большасць праціўнікаў аддзялення байкатавалі галасаванне.

Тагачасны кіраўнік урада Каталоніі Карлес Пучдэмон і іншыя каталонскія лідары падпісалі дэкларацыю аб незалежнасці, але адразу ж прыпынілі яе дзеянне з тым, каб пачаць перамовы з цэнтральнымі ўладамі.

Пераважная большасць краін не прызналі незалежнасць Каталоніі.

 Паводле ВВС