ХАМАС адхіліў прапанову Ізраіля наконт перамір'я ў абмен на вызваленне закладнікаў

Узначаленая лідарам ХАМАС Ісмаілам Ханіям дэлегацыя заявіла егіпецкім пасрэднікам у Каіры, што Ізраіль павінен спыніць агонь, вывесці з Газы свае войскі і вызваліць з турмаў усіх палесцінскіх зняволеных, перш чым можна будзе пачаць перамовы аб закладніках, паведамляе ВВС.

Паводле паведамленняў шэрагу заходніх СМІ, групоўка ХАМАС, якая кантралюе сектар Газа, адпрэчыла прапанову Ізраіля аб тыднёвым перамір'і ў Газе ў абмен на вызваленне каля 40 закладнікаў, уключаючы ўсіх жанчын і дзяцей, якія ўсё яшчэ застаюцца ў руках ісламістаў.

У сераду лідар групоўкі, прызнанай тэрарыстычнай шэрагам краін, Ісмаіл Ханія правёў у Каіры перамовы з прадстаўнікамі егіпецкіх улад аб магчымасці новай гуманітарнай паўзы ў вайне ХАМАС супраць Ізраіля, але, паводле паведамленняў знаёмых з ходам сустрэчы крыніц, гутарка была безвыніковай.

Егіпет, разам з Катарам, выступае адным з вядучых медыятараў у перамовах паміж Ізраілем і ХАМАС.

Як паведамляе амерыканская газета «Wall Street Journal», члены ўзначаленай Ханіям дэлегацыі заявілі егіпецкім пасрэднікам, што Ізраіль павінен спачатку спыніць наступ у сектары і вывесці адтуль свае войскі, перш чым абмяркоўваць любую патэнцыйную здзелку.

Са слоў прадстаўнікоў групоўкі, нават у гэтым выпадку Ізраілю давядзецца вызваліць з турмаў усіх палесцінскіх зняволеных, перш чым ХАМАС пагодзіцца адпусціць пакінутых закладнікаў.

Для Ізраіля такія ўмовы катэгарычна непрымальныя.

Як распавёў ВВС высокапастаўлены палесцінскі функцыянер, знаёмы з ходам праведзеных у Каіры перамоў, сустрэча «скончылася безвынікова».

Па словах крыніцы, Егіпет прапанаваў яшчэ адно гуманітарнае перамір'е, але ідэя «часовага рашэння» вайны была адвергнута дэлегацыяй ХАМАС.

Палесцінская ісламісцкая групоўка заявіла егіпцянам, што яе пазіцыя застаецца нязменнай. «Да канчатковага спынення агню ніякіх абменаў не адбудзецца», — сказала крыніца.

У мінулым месяцы прадстаўнікі вышэйшага кіраўніцтва ХАМАС, з якімі пагутарыла газета «New York Times», заявілі, што іх не клапоцяць пакуты і гібель насельніцтва Газы, выкліканыя развязанай імі вайной, і іх мэта не ў тым, каб зрабіць жыццё ў палесцінскім анклаве лепшым. Па прызнанні аднаго з іх, задача ХАМАС — у тым, каб зрабіць вайну на межах Ізраіля перманентнай.

Зрэшты, знаёмы з ходам перамоў у Каіры распавёў журналістам, што ўлады Егіпта не маюць намеру апускаць рукі: «Перамовы будуць працягвацца, егіпцяне з аптымізмам глядзяць на магчымасць прарыву ў бліжэйшыя дні, але яны перакананы, што сітуацыя складаная, і перамовы будуць цяжкімі і доўгімі».

Ханія, які жыве ў Катары, звычайна публічна ўмешваецца ў дыпламатычныя працэсы толькі тады, калі ёсць верагоднасць дасягнення прагрэсу.

Апошні раз ён ездзіў у Егіпет у пачатку лістапада за некалькі тыдняў да абвяшчэння адзінага на сённяшні дзень пагаднення аб спыненні агню ў вайне — тыднёвай паўзы, падчас якой былі вызвалены больш за 100 закладнікаў.

Ізраіль і ХАМАС дамовіліся аб вызваленні 50 закладнікаў у абмен на перамір'е ў Газе. Як і калі гэта будзе працаваць?

Крыніца, дасведчаная аб ходзе перамоў, паведаміла агенцтву «Reuters», што на іх абмяркоўваецца, каго з закладнікаў, якія ўсё яшчэ ўтрымліваюцца баевікамі ў Газе, можна вызваліць у рамках новага пагаднення аб перамір'і, і якіх зняволеных Ізраіль можа вызваліць у абмен.

Як адзначае карэспандэнт ВВС Ёланда Кнэл, хоць да поўнага спынення агню ў сектары Газа яшчэ далёка, візіт Ханіі ў Егіпет служыць прыкметай таго, што новая паўза ў баявых дзеяннях паміж Ізраілем і ХАМАС усё ж магчымая.

Аднак для гэтага неабходна змяніць публічную пазіцыю ХАМАС. Рух рэгулярна заяўляе, што вызваліць больш ізраільскіх закладнікаў толькі ў абмен на пастаяннае спыненне агню.

Паводле мясцовых СМІ, Ізраіль настойвае на вызваленні жанчын і людзей сталага веку, або тых закладнікаў, якія маюць патрэбу ў лячэнні. Палесцінцы, зняволеныя ў ізраільскія турмы за сур'ёзныя злачынствы, могуць быць вызвалены ў абмен.

Паводле звестак крыніцы «Reuters», перамовы ідуць інтэнсіўна, і пагаднення можна чакаць цягам некалькіх дзён.

Адзін з палесцінскіх чыноўнікаў паведаміў, што Ханія хацеў выслухаць прапановы егіпецкіх чыноўнікаў аб магчымым новым падыходзе да праблемы, і адзначыў, што афіцыйна ХАМАС адхіляе любое новае часовае спыненне агню і патрабуе пастаяннага спынення баявых дзеянняў.