Маці Саўчанка просіць сусветных лідараў аказаць ціск на Пуціна

Марыя Саўчанка заявіла, што яе дачка Надзея Саўчанка з'яўляецца палітычнай зняволенай, паведамляе Руская рэдакцыя "Радыё Свабода"



Маці Надзеі Саўчанка Марыя

Маці зняволенай у Расіі ўкраінкі Надзеі Саўчанка звярнулася да сусветных лідараў з просьбай аказаць ціск на прэзідэнта Уладзіміра Пуціна, каб дамагчыся вызвалення дачкі.

У інтэрв'ю агенцтву «Асашыэйтэд Прэс» Марыя Саўчанка заявіла, што яе дачка з'яўляецца палітычнай зняволенай. Яна таксама дадала, што следства да гэтага часу не прадставіла доказаў віны Надзеі Саўчанка. У Расіі яе абвінавачваюць у датычнасці да гібелі двух расійскіх журналістаў на ўсходзе Украіны, а таксама ў незаконным перасячэнні мяжы.

«Я ў роспачы, я маці, якая гатовая аб'ездзіць увесь свет, каб мае словы былі пачутыя», — сказала Марыя Саўчанка.

Раней яна звярнулася з лістом да прэзідэнта Уладзіміра Пуціна, а таксама канцлера Германіі Ангелы Меркель з просьбай дапамагчы вярнуць дачку на Украіну.

19 красавіка ў Нью-Ёрку Марыя Саўчанка ўдзельнічала ў акцыі ў падтрымку яе дачкі ля будынка сталага прадстаўніцтва Расеі пры ААН. На пікет з патрабаваннем вызваліць Надзею Саўчанка сабраліся больш за сто чалавек.

Надзея Саўчанка з мінулага лета знаходзіцца пад вартай у Расіі. Яна адмаўляе віну і сцвярджае, што яе захапілі і пераправілі на расійскую тэрыторыю сепаратысты.

У снежні мінулага года Саўчанка абвясціла галадоўку пратэсту, якую трымала 80 дзён. 5 сакавіка яна прыслухалася да парады лекараў і пагадзілася часткова спыніць галадоўку. 16 сакавіка яна аднавіла галадоўку з патрабаваннем змяніць ёй меру стрымання. Тэрмін арышту Надзеі Саўчанка па рашэнні суда ў канцы лютага быў працягнуты да 13 траўня.