Meta перастае быць сусветам? Цукерберг звальняе 11 тысяч сваіх супрацоўнікаў
У кампаніі будзе працягнутая забарона на працаўладкаванне.
Стваральнік Facebook і кіраўнік «мтасусвету» Марк Цукерберг
Карпарацыя Meta, якая валодае сацыяльнымі сеткамі Facebook і Instagram, звольніць больш за 11 тысяч чалавек у рамках масавага скарачэння кадраў і мінімізацыі выдаткаў. Гэта прыкладна 13% супрацоўнікаў.
У лісце кіраўніка карпарацыі Марка Цукерберга, апублікаваным на сайце кампаніі, гаворыцца таксама пра працяг забароны на працаўладкаванне.
Паводле слоў Цукерберга, адной з прычын такога рашэння сталі памылковыя інвестыцыі ў онлайн-гандаль падчас пандэміі COVID-19, а таксама ўзмацненне канкурэнцыі і запаволенне эканомікі, што прывяло да зніжэння прыбытку.
«Я хачу ўзяць на сябе адказнасць за гэтыя рашэнні і за тое, як мы трапілі сюды. Я ведаю, што гэта цяжка для ўсіх, і мне асабліва шкада тых, каго гэта закранула», — напісаў Цукерберг.
Кампанія таксама зменшыць колькасць офісаў, перагледзіць свае выдаткі на інфраструктуру і перавядзе некаторых супрацоўнікаў на сумеснае выкарыстанне працоўных сталоў, пры гэтым у бліжэйшыя месяцы чакаецца больш аб'яў аб скарачэнні выдаткаў.
Паводле інфармацыі Bloomberg, акцыі Meta у гэтым годзе ўпалі на 71%. Зніжэнне выдаткаў, найбольш рэзкае з моманту заснавання Facebook у 2004 годзе, адлюстроўвае рэзкае запаволенне росту рынку лічбавай рэкламы, рэцэсію ў эканоміку і шматмільярдныя інвестыцыі Цукерберга ў праект віртуальнай рэальнасці, які называецца «метасусветам».
Цукерберг заявіў, што чакаў, што ўсплёск электроннай камерцыі і вэб-трафіку з пачатку пандэміі COVID-19 стане часткай пастаяннага паскарэння. «Але макраэканамічны спад, узмацненне канкурэнцыі і страта рэкламных сігналаў прывялі да таго, што наш даход аказаўся нашмат ніжэйшым, чым чакалася. Я зразумеў няправільна».
Звольненыя супрацоўнікі атрымаюць выхадную дапамогу, акрамя таго, кампанія прапануе шасцімесячнае медыцынскае страхаванне, паслугі па працаўладкаванні і іміграцыйную падтрымку.
У канца верасня 2022 года ў Meta працавалі больш за 87 000 чалавек.
Нядаўна новы ўладальнік Twitter Ілан Маск таксама правёў скарачэнні ў кампаніі. Пасля гэтага былі звольненыя 3700 супрацоўнікаў.