Прэзідэнт Малдовы Майя Санду: эскалацыя ў Ціраспалі зыходзіць ад сіл унутры Прыднястроўя

Прэзідэнт Малдовы Майя Санду зрабіла заяву для прэсы пасля пасяджэння Вышэйшага Савета Бяспекі.

Падчас пасяджэння ВСБ Малдовы абмяркоўваліся інцыдэнты ў Прыднястроўі і падзеі ў рэгіёне, паведамляе point.md.

Нагадаем, сёння паведамлялася пра выбухі ў Ціраспалі — у штаб-кватэры МГБ, на аэрадроме ў Ціраспалі і ў пасёлку Маяк.

«Па наяўнай у нас на дадзены момант інфармацыі, гэтыя эскалацыйныя намеры зыходзяць ад сіл унутры прыднястроўскага рэгіёну, якія з'яўляюцца праваеннымі сіламі і зацікаўлены ў дэстабілізацыі сітуацыі ў рэгіёне», — сказала прэзідэнт Малдовы ў адказ на пытанне, ці ведаюць улады Кішынёва, хто можа стаяць за гэтымі нападамі.

Пры гэтым Майя Санду распарадзілася прыняць меры па ўзмацненні інтэнсіўнасці праверак руху ў ваколіцах рэгіёну, патрулявання і праверцы тэрыторыі і межы.

Таксама было даручана павысіць узровень бяспекі аб'ектаў інфраструктуры.

Раней прэс-сакратар Крамля Дзмітрый Пяскоў заявіў, што ў адміністрацыі прэзідэнта РФ уважліва сочаць за сітуацыяй у Прыднястроўі. У апошнія дні адтуль рэгулярна паведамляюць аб выбухах, а Савет бяспекі непрызнанай рэспублікі абвясціў чырвоны ўзровень тэрарыстычнай небяспекі.

Нагадаем, у Прыднястроўі размяшчаюцца расійскія войскі. Яно мяжуе з Адэскай вобласцю Украіны.

Варта адзначыць, што 22 красавіка намеснік камандуючага войскамі Цэнтральнай ваеннай акругі (ЦВА) Расіі Рустам Мінекаеў заявіў, што Расія плануе захапіць поўдзень Украіны і выйсці да Прыднястроўя, дзе нібыта назіраецца «прыгнёт рускамоўнага насельніцтва».