Пуцін назваў Скрыпаля здраднікам радзімы і падонкам

Кіраўнік Расіі лічыць, што вакол «справы Скрыпаля» штучна раздзімаецца шпіёнскі скандал. Ён выказаў надзею на хуткае завяршэнне «інфармацыйнай кампаніі вакол гэтага скандалу».

Выступаючы на паседжанні «Расійскага энергетычнага тыдня» ў Маскве, прэзідэнт Расіі Уладзімір Пуцін заявіў, што скандал, звязаны з «справай Скрыпалёў», раздзімаецца штучна, а сам экс-супрацоўнік ГРУ Сяргей Скрыпаль — здраднік радзімы. Трансляцыю вядзе тэлеканал «Расія 24» на сваім YouTube-канале.
«Што тычыцца Скрыпалёў, то штучна раздзімаецца гэты шпіёнскі скандал чарговы. <...> Ён [Сяргей Скрыпаль] проста шпіён. Здраднік радзімы. Ёсць такое паняцце — здраднік радзімы. Вось ён — адзін з іх. <...> Ён проста падонак», — заявіў кіраўнік дзяржавы, адказваючы на пытанне аб антырасійскіх санкцыях, якія былі ўведзеныя пасля атручвання ў брытанскім Солсберы.
Пуцін запатрабаваў ад Вялікабрытаніі прадаставіць Расіі доказы яе датычнасці да таго, што здарылася.
«Валтузня паміж спецслужбамі — гэта што, учора нарадзілася, ці што? Як вядома, шпіянаж, як і прастытуцыя, — адна з самых найважнейшых прафесій у свеце», — заявіў расійскі лідар.
Ён падкрэсліў, што чым хутчэй скончыцца інфармацыйная кампанія вакол гэтага скандалу, тым будзе лепш. Кіраўнік дзяржавы выказаў сваё абурэнне з нагоды таго, што Расію абвінавачваюць у атручванні «Навічком» яшчэ і старонняга бяздомнага чалавека.


«Калі мы гаворым пра тое, што труцілі Скрыпаля там, вы хочаце сказаць, што мы яшчэ нейкага бяздомнага чалавека атруцілі, ці што? Я часам гляджу на тое, што адбываецца вакол гэтай справы, і проста дзіўлюся. Прыехалі нейкія мужыкі і пачалі цкаваць там бамжоў у вас. Гэта што за трызненне? У ачыстцы, ці што, яны працуюць?» — працягнуў расійскі прэзідэнт.

Чытайце таксама: Як забівалі Скрыпаля. Рэканструкцыя на падставе расследавання

«Гэты Скрыпаль, як я ўжо сказаў, здраднік, яго злавілі, ён пакараны, адседзеў у агульнай складанасці пяць гадоў у турме, мы яго выпусцілі. Усё. Ён з'ехаў і яшчэ працягваў супрацоўнічаць, і кансультаваў нейкія спецслужбы», — дадаў Пуцін.

Паводле РБК