Ваеначальніка «ДНР», які анансаваў прымяненне РФ хімічнай зброі ў Марыупалі, затрымала ФСБ

У акупаваным Данецку супрацоўнікі Федэральнай службы бяспекі Расіі затрымалі неафіцыйнага прадстаўніка Міністэрства абароны так званай «ДНР» Эдуарда Басурына. Пра гэта заявіла Галоўная ўправа выведкі Мінабароны Украіны, паведамляе Еспресо.

Устаноўлена, што пасля зносін з супрацоўнікамі ФСБ у невядомым кірунку вывезены Эдуард Басурын, намеснік камандуючага корпуса Мінабароны «ДНР», — адзначае ўкраінская ваенная выведка.

Затрыманне звязваюць з «неасцярожнай заявай, якая раскрыла планы РФ прымяніць хімічную зброю супраць украінскіх абаронцаў Марыупаля».

Нагадаем, расійскія СМІ распаўсюдзілі заяву Басурына, што штурмаваць падземныя ўмацаванні «Азоўсталі» ў Марыупалі няма сэнсу. Маўляў, мэтазгодна перакрыць усе выхады і скарыстацца хімічнай зброяй.

Пазней у абложаным Марыупалі сапраўды было зафіксавана падзенне снарада з невядомым хімічным рэчывам, ад якога пацярпелі некалькі ўкраінскіх абаронцаў горада.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: