Хронікі рэпрэсій. У Браславе за каментарыі — пяць гадоў калоніі, у Баранавічах — два

У Беларусі працягваюць затрымліваць і судзіць па палітычных матывах. Чарговы спіс рэпрэсіраваных беларусаў склалі праваабаронцы.

Віцебскі абласны суд у закрытым пасяджэнні 10 жніўня вынес прысуд 38-гадоваму жыхару Браслаўскага раёна Роберту Кузняцову. Яго абвінавацілі па некалькіх артыкулах Крымінальнага кодэкса. Справу разглядала суддзя Галіна Бондал.

У ходзе судовага следства было ўстаноўлена, што абвінавачваны Кузняцоў у жніўні 2021 года размясціў у інтэрнэце каментарыі і графічныя матэрыялы, якія ўтрымліваюць «заклікі да распальвання сацыяльнай варожасці, захопу дзяржаўнай улады, гвалтоўнай змены канстытуцыйнага ладу Рэспублікі Беларусь», а таксама абразы ў адрас Лукашэнкі.

У лістападзе 2021 года мужчына размясціў у інтэрнэце «абразлівыя фотавыявы дзяржаўнага сцяга і каментарыі да яго».

У выніку яго асудзілі на пяць гадоў калоніі.

За абразу Лукашэнкі і Караева асудзілі палітзняволенага жыхара Баранавічаў Аляксандра Кудловіча.

У верасні і лістападзе 2020 года мужчына размясціў у telegram-канале і мэсэнджары Viber абразлівую інфармацыю ў дачыненні да Лукашэнкі, а таксама міністра ўнутраных спраў, якім на той момант з'яўляўся Юрый Караеў.

Суд Баранавіцкага раёна і горада Баранавічы прызнаў мужчыну вінаватым і прызначыў пакаранне ў выглядзе 2 гадоў пазбаўлення волі ў папраўчай калоніі агульнага рэжыму. Справу разглядала суддзя Іна Паўлоўская.

Сістэмны блок і мабільны тэлефон як прылады ўчынення злачынства канфіскаваны ў даход дзяржавы.

Затрымалі супрацоўніка Гродзенскага мясакамбіната. У жніўні 2020 года ён «пад уплывам пратэсных Telegram-каналаў» пачаў распаўсюджваць экстрэмісцкія матэрыялы. Ён прызнаў віну і абавязаўся выдаліць матэрыялы са сваёй старонкі.

Праўладныя тэлеграм-каналы паведамілі пра затрыманне жыхара Брэста Андрэя Цалюка. На «пакаяльным відэа» хлопец кажа, што быў затрыманы за распаўсюджанне асабістых даных супрацоўнікаў міліцыі, суддзяў і заклікі людзей да гвалтоўных дзеянняў.

Таксама паведамляецца, што мужчына «пакінуў больш як 2 тысячы экстрэмісцкіх паведамленняў, з якіх мінімум 100 запісаў утрымліваюць у сабе прыкметы парушэння закону».

У Наваполацку сёння быў затрыманы Ігар Шарамаў. Паводле папярэдняй інфармацыі, прычына — фотаздымак з рамкай у выглядзе сцяга Украіны. Судовы працэс па справе Ігара пройдзе ў панядзелак.

Актывіста анархічнага руху Ігара Аліневіча, асуджанага да 20 гадоў калоніі ўзмоцненага рэжыму, этапавалі з мазырскай калоніі ў жодзінскую турму. Гэта адбылося яшчэ 11 жніўня.

Нагадаем, што суд па ўзмацненні рэжыму і пераводзе Ігара адбыўся 8 жніўня. Рашэнне прымала суддзя Валянціна Новікава.

На які тэрмін Аліневіча перавялі ў турму, пакуль невядома.

Палітзняволеную Алену Гнаук перавялі з СІЗА-6 у папраўчую калонію №4. Бліжэйшыя два тыдні яна будзе знаходзіцца на каранціне.

У інстаграм-акаўнце ў падтрымку Алены адзначаецца, што яна паспела адправіць лісты блізкім. Апошнія дні перад этапам Гнаук была ў камеры і атрымала пасылкі, якія ёй прыходзілі падчас знаходжання ў карцары.

Палітзняволеная напісала, што ў яе ўсё ў парадку, адчувае сябе добра.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: