Лепш быць нелегальным мігрантам у Еўропе, чым легальным зняволеным у беларускай турме
З улікам геапалітычных поспехаў беларускіх улад як бы ні склалася, што пашпарт Новай Беларусі стане больш жаданым за беларускі пашпарт, разважае аўтар тэлеграм-канала «Лісты да дачкі».
Апошнія два дні беларускі тэлевізар інтэнсіўна радаваўся
пашпартнаму манеўру. Цікава, што два дні да гэтага беларускі тэлевізар пра
пашпартны манеўр маўчаў. Але потым яму, мабыць, патлумачылі, што трэба радавацца — і ён пачаў радавацца.
Затое ўжо як патлумачылі, то радаваўся ад душы. Радаваўся так, як быццам трыста тысяч мігрантаў выстраіліся ўздоўж мяжы і на каленях просяць асабіста ў яго, у сэнсе тэлевізара, прабачэння.
Яны ў сябе ў тэлевізары гэтых збеглых ужо нават падзяліць паспелі. Каго ў турму — а каго на вольнае пасяленне.
Тэлевізару, канечне, абсалютна неістотна, што ніякіх ахвочых папрасіць прабачэння ў абмен на пашпарт ніхто не бачыў. Іх нават менш, чым жадаючых пагутарыць з Камісіяй па дараваннях і вяртаннях. А камісія па дараваннях і вяртаннях, між іншым, за паўгода змагла вярнуць двух чалавек.
(Камісія, праўда, кажа, што прабачэння ў яе папрасілі сто чалавек, але прад'явіць змагла толькі дваіх).
І я, вядома, падазраю, што з пашпартамі выйдзе такі ж альтэрнатыўны поспех. Што лепш беларусу быць нелегальным мігрантам у Еўропе, чым легальным зняволеным у беларускай турме. Ды і нелегальным мігрантам нікому, на самай справе, станавіцца не прыйдзецца.
Вось з наступнага года Офіс Святланы Ціханоўскай абяцае пачаць выдаваць пашпарты Новай Беларусі. І раней гэта мела такое больш маральна-сімвалічнае значэнне. Але калі беларускія ўлады зрабілі свой пашпартны манеўр, перспектыва пашпарта Новай Беларусі моцна змянілася ў лепшы бок.
Раней Еўрасаюз чаму не хацеў яго прызнаваць? Таму што ў Еўрасаюза стымулу не было. Ну напраўду, навошта беларусам новы пашпарт, калі ў іх ёсць стары? А цяпер старыя пашпарты будуць заканчвацца. І Еўрасаюзу трэба думаць, што яму рабіць з бяспашпартнымі беларускімі мігрантамі. Назад жа беларускім уладам выдаваць беларускіх мігрантаў Еўрасаюз не будзе. Выдаваць беларускіх мігрантаў беларускім уладам Еўрасаюз можа толькі ў фантазіях беларускага тэлевізара.
Глядзіце таксама
І вось навошта, спытаюся, Еўрасаюзу прыдумляць уласнае вырашэнне праблемы беларускіх мігрантаў, калі яму прапануюць ужо гатовае? З пашпартамі Новай Беларусі. Таму ў пашпарта Новай Беларусі, пасля пашпартнага манеўру, шанцы на прызнанне моцна павысіліся.
І ведаеш, з улікам геапалітычных поспехаў беларускіх улад як бы ні склалася, што пашпарт Новай Беларусі стане больш жаданым за беларускі пашпарт. Ну карта паляка ж стала.
Наогул, апошнім часам беларускія ўлады неяк здзяйсняюць асабліва шмат альтэрнатыўна разумных учынкаў. Вось як быццам яны хутка скончацца.
Я, дарэчы, адчуў за гэтыя пару дзён вострае пачуццё дэжавю. Я маю на ўвазе сапсаваную ваду ў Мінску. Вось у 2020-м таксама вада сапсавалася — потым сокалы скінулі пацука на прыступкі дома ўрада ў дзень адмовы ў рэгістрацыі Бабарыкі і Цапкалы.
Глядзіце таксама
