Шэсце памяці Жызнеўскага ў Кіеве. Фота і відэа
У дзень народзінаў героя «Нябеснай сотні» беларуса Міхаіла Жызнеўскага, які адным з першых загінуў на Еўрамайдане, у Кіеве прайшло шэсце ягонай памяці.
Увечары ў аўторак, 26 студзеня, актывісты шэрагу патрыятычных арганізацыяў сталіцы Украіны ўдзельнічалі ў шэсці памяці Міхала Жызнеўскага, арганізаваным рухам салідарнасці «Разам».
Шэсце да дня народзінаў беларускага героя Украіны прайшло праз увесь цэнтр гораду, у тым ліку і праз майдан Незалежнасці, да помніка Жызнеўскаму на вуліцы Грушэўскага, дзе ён загінуў ад міліцэйскай кулі.
Добраахвотнік Тактычнай групы "Беларусь" Ян Мельнікаў
На чале шэсця з бел-чырвона-белым сцягам крочыў добраахвотнік Тактычнай групы «Беларусь» Ян Мельнікаў, далей актывісты неслі велізарнае бел-чырвона-белае палатно.
Ля месца забойства Міхася Жызнеўскага адбыўся невялікі жалобны мітынг, на якім выступілі людзі, якія асабіста ведалі героя.