У Беларусі заблакавалі change.org і petitions.by

Рэсурсы сталі недаступныя на падставе рашэння Міністэрства інфармацыі. Адпаведнае паведамленне з'яўляецца пры спробе зайсці на сайты, піша Свабода.

Платформа petitions.by пачала працу ўвосень 2015 году. Як казаў стваральнік праекту Уладзімір Кавалкін, галоўная яго мэта — заахвоціць грамадзян да ўдзелу ў вырашэнні мясцовых праблемаў, павысіць адказнасць органаў улады перад грамадзянамі і паспрыяць развіццю адкрытага дыялогу паміж грамадзянамі і ўладамі ўсіх узроўняў.
Петыцыі на сайце ствараюцца ў адпаведнасці з законам аб зваротах грамадзян. Падпісанты падаюць свае сапраўдныя звесткі, а чыноўнікі абавязаныя адказваць на петыцыі як на калектыўны зварот.
Сёлета ў лютым на сайце больш за 103 тысячы чалавек падпісаліся пад зваротам супраць прызнання бел-чырвона-белага сцяга экстрэмісцкім і за прызнанне яго гісторыка-культурнай каштоўнасцю.
У сакавіку сайт на кароткі час узламалі.
Адміністратараў сайту пасля выбараў не раз затрымлівалі і забіралі тэхніку, паведамляла каманда petitions.by.
Chnge.org — міжнародная платформа для збору подпісаў. З юрыдычнага гледзішча подпісы пад петыцыямі на change.org не абавязваюць беларускіх чыноўнікаў разглядаць зварот і даваць на яго адказ. Тым не менш там таксама збіраліся подпісы пад гучнымі петыцыямі. Сёлета амаль 84 тысячы падпісантаў патрабавалі ад кіраўніцтва кампаніі Yara разарваць кантракт з «Беларуськаліем».