У ашмянскага фермера забралі і забілі 600 свіней
Захады супраць распаўсюду вірусу афрыканскай чумы свіней у выглядзе масавага знішчэньня пагалоўя з калгасных фермаў і прыватных падворкаў абарочваюцца не толькі матэрыяльнымі, але і маральнымі стратамі. Фермер з Ашмянскага раёну на Гарадзеншчыне Іван Гарлуковіч у адзін дзень страціў усё, да чаго ішоў доўгія гады, — свіны статак у 600 галоў. Як жыць далей?
Разам са збанкрутаваным фермерам такім пытаннем задаюцца ўсё больш беларусаў.
Аднавяскоўцы Івана Гарлуковіча ў
шоку: ветэрынары за дзень усыпілі ўсіх свіней у гаспадарцы паспяховага прадпрымальніка. На ферме ў вёсцы Наваполле пад Ашмянамі, дзе раней кіпела жыццё, цяпер мёртвая цішыня.
«Так, ўсіх забралі, ушчэнт. Зараз у вёсцы, напэўна, ні ў каго свіней не засталося —
людзі з-за страху калолі
— каб толькі не аддаваць.
У нас тут, у асноўным, старыя жывуць, якія і так шмат не трымалі, можа, дзве-тры.Але і тых усіх парэзалі», — кажа жыхар вёскі.
У адрозненне ад аднавяскоўцаў, у фермера было некалькі сотняў свіней.
«Дзесьці 600 з лішнім галоў. Была вялізная свінаферма.Таму ўдар быў для яго вельмі моцны», — кажа селянін.
Сам Іван Гарлуковіч размаўляць асабліва не хоча —
ад такой страты адысці няпроста. "Не забралі, а закапалі, знішчылі, нічога не пакінулі... Але ведаеце, не хачу я гаварыць гэта па тэлефоне», — сказаў фермер.
Марыя Антонаўна, маці пацярпелага фермера, у
роспачы: столькі гадоў руплівай працы сына закапаны разам з усім статкам.
«Усіх забралі, няма ні адной. І каранціну ж ніякага не
было, нічога. Выклікалі гарадзенскіх лекараў, тыя сказалі, што ходзіць нейкая чума ці нешта
такое. А цяпер людзі кажуць усё, што хочуць. Я вось толькі з касцёла. Чула там, як казалі, што гэта ён знарок зрабіў, нейкай атруты даў свінням. Што за глупства? Навошта ж так абгаворваюць? Я,
вядома, ужо старая, што мне адмерана — большага не трэба. Цяпер прашу ў Бога, каб толькі майму сыночку паслаў здароўе. Павінна ж
быць нейкая справядлівасць. Падумаць толькі —усю ферму забралі», — кажа яна.
Нягледзячы на тое,
што на Гарадзеншчыне каранцін афіцыйна абвешчаны толькі ў вёсцы Чапунь Іўеўскага раёна, геаграфія барацьбы з вірусам афрыканскай чумы імкліва пашыраецца.
Як у выпадку з гаспадаркай Івана Гарлуковіча, якая да гэтага часу фармальна не трапіла ў небяспечную зону, «свіныя ліквідатары» працуюць у Валожынскім, Карэліцкім, Навагрудскім, а
зараз і ў Ашмянскім раёнах. Акрамя таго, татальная зачыстка падворкаў ідзе ў
шэрагу рэгіёнаў Мінскай, Брэсцкай і Віцебскай абласцей.
Найбольш
балючыя для людзей пытанні — не
толькі прымусовае знішчэнне свінога пагалоўя, што наўпрост адбіваецца на харчовай бяспецы, але і абяцаная кампенсацыя страт. Як кажуць жыхары вёскі Казевічы побач з
«чумным эпіцэнтрам» у Чапуні, свіней у іх забралі яшчэ ў канцы чэрвеня, а грашовых разлікаў няма да гэтага часу.
Некалькі месяцаў беларускія ўлады хавалі інфармацыю пра вірус афрыканскай чумы свіней. Калі ў красавіку пачалі прыходзіць весткі аб масавым забоі на комплексе «Усходні» ў Баранавіцкім раёне, чыноўнікі запэўнівалі: падзёж не перавышае санітарных нормаў, падстаў для панікі няма. Пасля таго, як расійскія ветэрынарныя службы на падставе ўласных аналізаў пацвердзілі, што ў Беларусі зафіксавана ўспышка афрыканскай чумы, мясной імпарт з нашай краіны ўслед за Расіяй прыпынілі Украіна, Літва і Латвія.