Журналістку Ірыну Слаўнікаву таксама арыштавалі на 15 сутак

15 лістапада ў судзе Першамайскага раёна суддзя Максім Трусевіч другі раз запар асудзіў Ірыну Слаўнікаву на 15 сутак. Раней такі ж тэрмін атрымаў яе муж Аляксандр Лойка.

Журналістку, як і яе мужа, абвінавацілі ў «дробным хуліганстве». Але, па словах сведкі-міліцыянта, «агрэсіўныя паводзіны» ў Ірыны пачаліся пасля таго, як яна заўважыла, што на мужа новы пратакол складаюць. Вопратку Ірыны міліцыянт таксама не памятае. Ён сцвярджае, што рост Ірыны 170 сантыметраў, калі на самай справе — 162.
Суддзя Трусевіч арыштаваў Слаўнікаву па арт. 19.1 КаАП на чарговыя 15 сутак, паведамляюць праваабаронцы.