Сёння абвесцяць уладальніка Нобелеўскай прэміі па літаратуры

8 кастрычніка ў Стакгольме назавуць імя уладальніка Нобелеўскай прэміі па літаратуры за 2015 год.



У чацвер, 8 кастрычніка, у Стакгольме назавуць уладальніка Нобелеўскай прэміі па літаратуры за 2015 год. Звычайна, у спісе кандыдатаў, які разглядае Шведская акадэмія, пяць прозвішчаў. Большасцю галасоў будзе абраны адзін з іх, паведамляе "Еўрарадыё". 

Шведскія журналісты, выдаўцы, літаратурныя крытыкі склалі свой спіс фаварытаў. У ім знаходзіцца беларуская пісьменніца Святлана Алексіевіч, Эн Карсан з Канады, Нгугі Ва Тхіёнга з Кеніі, Філіп Рот і Дон Дэліла з ЗША, Нурудзін Фарах з Самалі, Петэр Хандке з Аўстрыі, японец Харукі Муракамі ды іншыя. Свой спіс склалі букмекеры, у ім таксама прысутнічае Алексіевіч.

Летась Нобелеўская прэмія па літаратуры была прысуджаная французскаму пісьменніку Патрыку Мадзьяно. Святлана Алексіевіч таксама называлася сярод фаварытаў.

Уручэнне Нобелеўскіх прэмій традыцыйна праходзіць у Стакгольме 10 снежня. Сёлета кожны лаўрэат атрымае 953 тысячы долараў.