Слуцкі актывіст беларусізуе паштовыя тэрміналы

Намаганнямі прадстаўніка Рады Руху «За Свабоду» і адначасна сябра ТБМ Віталя Амяльковіча на экранах паштовых тэрміналаў, якія фармуюць электронную чаргу кліентаў, з’явілася беларуская мова.



«Я звярнуў увагу, што тэрміналы ў аддзяленнях Белпошты, якія друкуюць наведнікам талончыкі з нумарам электроннай чаргі, прапануюць інфармацыю выключна на расейскай мове. Гэта мне падалося ненармальным. Я звярнуўся ў Слуцкі раённы вузел паштовай сувязі з лістом, у якім выказаў сваё меркаванне з гэтай нагоды і просьбу дадаць да экраннага меню тэрмінала беларускую мову. Балазе у банкаматах магчымасць абіраць беларускую ці расейскую мову паспяхова рэалізавана. 4 лістапада начальніца Слуцкага раённага вузла паштовай сувязі спадарыня Цяцерская адказала мне, што мая прапанова будзе перададзена распрацоўшчыкам праграмнага забеспячэння», — распавядае Віталь Амяльковіч.

Актывіст успрыняў было такі адказ як завуаляваную адмову: маўляў, мы не супраць, але вырашэнне пытання ад нас не залежыць. Але праз некалькі дзён на тэрміналах побач з рускай мовай з’явілася беларуская.

«Гэта толькі першы крок на шляху да перамогі. Талончыкі пакуль што друкуюцца па-руску, па-руску абвяшчаецца і запрашэнне падысці да акенца, дзе абслугоўваецца кліент. Таму я зрабіў запыт з просьбай даць звесткі пра распрацоўшчыка праграмнага забеспячэння, каб працягнуць перапіску непасрэдна з ім», — дадае Віталь Амяльковіч.