Калі Пуцін зараз адчуе сябе пераможцам, ён пойдзе далей

Расія абвастрыла баявыя дзеянні на Данбасе, каб патрабаваць выканання сваіх умоў падчас сустрэчы «нармандскай чацвёркі» ў Мінску.



putin_cool_guy.jpg

Пра гэта «Радыё Свабода» заявіў расійскі палітолаг Станіслаў Бялкоўскі.
«Паколькі таварам, які прадае Уладзімір Пуцін, з'яўляецца мір, то, вядома, ён павінен значна абвастрыць вайну перад тым, як ісці на перамовы з еўрапейскімі лідарамі. Яму трэба падкрэсліць, што толькі ён можа ўстанавіць мір ва Украіне, а за міратворчасць трэба добра плаціць», — сказаў Станіслаў Бялкоўскі.
Разам з тым эксперт адзначыў, што, хутчэй за ўсё, фармальна пазітыўныя навіны сёння з Мінска паступяць — з шэрагу ўскосных прыкмет, прэзідэнт Украіны Пётр Парашэнка гатовы здаць шэраг пазіцый і хоча дамовіцца з Уладзімірам Пуціным.
«Але фактычна гэта не будзе азначаць заканчэння вайны, таму што Украіна не з'яўляецца канчатковай мэтай Уладзіміра Пуціна. Украіна — толькі прадмет і прастора для перамоваў і гандлю з Захадам. Канчатковая мэта Пуціна — стаць Сталіным і вярнуць свет у Ялцінска-Патсдамскі фармат, які быў спынены яшчэ ў 1989 годзе, калі разваліўся савецкі блок. А вось з гэтым Захад ужо ніколі не пагодзіцца.
Прымірэнне на Данбасе магчымае, набор патрабаванняў Пуціна зразумелы — гэта і аўтаномія Данецкага і Луганскага рэгіёнаў, і гарантыі з боку Украіны жыццезабеспячэння Крыма, бо Пуцін не ў стане акупаваць калідор паміж расійска-ўкраінскай мяжой і Крымам. Але на гэтым канфлікт не скончыцца. Калі Пуцін адчуе сябе пераможцам, то ён пойдзе далей. З аднаго боку, Захад гэта разумее, але з другога — вельмі вялікія страхі перад вялікай вайной з Расіяй. Таму Захад будзе рабіць усё магчымае, каб не дапусціць гэтай вайны, у тым ліку і коштам вялікіх саступак Расійскай Федэрацыі», — мяркуе Станіслаў Бялкоўскі.