«Мы хацелі б бачыць Yara партнёрам у будучыні». У найбуйнейшай газеце Нарвегіі выйшаў артыкул Ціханоўскай

«Беларусы чакаюць больш канкрэтных дзеянняў ад кампаніі Yara», — піша лідарка дэмакратычных сіл.

Супраца Yara з «Беларуськаліем» дае мінскаму рэжыму грошы на ўтрыманне рэпрэсіўнай машыны, піша лідарка беларускага руху за свабодныя выбары ў выданні VG, самым тыражным выданні скандынаўскай краіны.

Яна нагадвае, што Yara абяцала перагледзець сваю прысутнасць у Беларусі, улічваючы сітуацыю з правамі чалавека. А яна толькі пагоршала. Ціханоўская нагадвае, што яе муж, Сяргей Ціханоўскі, быў асуджаны на 18 гадоў турэмнага зняволення.

Яна таксама піша пра поўную неабароненасць працоўнага чалавека ў Беларусі. Арыштаваныя 9 з 12 лідараў «Рабочага руху», звольненыя прыкладна 130 супрацоўнікаў «Беларуськалія», расказвае Ціханоўская.

«Агулам на сёння вядома прыкладна 1000 палітвязняў», — піша Ціханоўская.

«Відавочна, што партнёрства «Беларуськалія» і Yara — частка апоры рэпрэсіўнага рэжыму. А фінансаванне рэжыму раўназначнае фінансаванню рэпрэсій».

Ціханоўская заклікае Yara дзейнічаць па прыкладзе 32 іншых міжнародных кампаній, сярод якіх Rolls Royce, Scandia Steel і British American Tobacco, і адмовіцца ад супрацы з лукашэнкаўцамі.

«Ранейшых намаганняў Yara, скіраваных на дасягненне перамен да лепшага, недастаткова. Зараз патрэбныя канкрэтныя дзеянні. Мы хацелі б бачыць Yara партнёрам у будучыні, — падкрэслівае Ціханоўская. — Але цяпер для Yara час спыніць супрацу і не спансараваць рэжым».

Паводле «Нашай Нівы».