«Google» выдаліў рэкламу з допытамі беларускіх палітвязняў з YouTube

Кампанія «Google» выдаліла рэкламу з допытамі беларускіх палітвязняў з сэрвіса YouTube. Гэта было зроблена пасля скаргі Святланы Ціханоўскай у кампанію, паведамляе «Еўрарадыё» са спасылкай на прэс-службу Ціханоўскай.

Святлана Ціханоўская прывяла прыклады больш як 40 рэкламных відэа, у якіх можна бачыць прызнанні на камеру Мікалая Брэдзелева, Аляксандра Багданава ды іншых.
Ёй адказаў віцэ-прэзідэнт кампаніі «Google» Каран Бхаціа:
«Мы выдалілі рэкламныя ролікі, якія вы адзначылі, за парушэнне нашых правілаў. Мы абмежавалі гэтыя рэкламныя акаўнты ад паказу якіх-небудзь дадатковых аб'яў».
Таксама прадстаўнік «Google» паведаміў пра распрацоўку аўтаматычнай сістэмы, якая больш не дазволіць прапагандыстам размяшчаць падобныя ролікі.