Urbi et Orbi: Папа Францыск маліўся за мір у былых савецкіх рэспубліках і доступ да вакцын

Апоўдні 25 снежня Папа Францыск звярнуўся да вернікаў і да ўсіх людзей добрай волі з традыцыйным святочным пасланнем Urbi et Orbi (Гораду і ўсяму свету), паведамляе «Радыё Ватыкана».

cq5dam.thumbnail.cropped.750.422.jpeg

Гэты няпросты момант гісторыі, адзначыў Папа, пазначаны экалагічным крызісам, сур'ёзным эканамічным і сацыяльным дысбалансам, ён узмоцнены пандэміяй COVID-19, і таму мы асабліва маем патрэбу ў братэрстве, заснаваным на сапраўднай любові, здольнай да эфектыўнай міласэрнасці ў адносінах да ўсіх: гэта ж тычыцца адносін паміж народамі і нацыямі.
Папа Францыск маліўся пра палітыкаў, каб яны аднавілі міжнароднае супрацоўніцтва, пачынаючы з сектара аховы здароўя, і гарантавалі ўсім людзям, асабліва самым уразлівым, доступ да вакцын і лячэння. Сутыкнуўшыся з праблемай, што не ведае межаў, нельга ўзводзіць перашкоды. Мы ўсе ў адной лодцы, і кожны чалавек — мой брат, падкрэсліў Папа. У кожным чалавеку мы павінны заўважаць адлюстраванне аблічча Божага: бачыць Госпада, таго, хто заклікае аб дапамозе, у кожным пакутуе, хворым, бедным, беспрацоўным і адкінутым, у кожным мігранце і ўцекачу.
Біскуп Рыма з болем нагадаў пра ваенныя канфлікты і напружаныя сітуацыі, — прычыну пакут мноства людзей у Сірыі, Іраку, Йемене, Лівіі, у Ізраілі і Палестыне. Святы Айцец заклікаў да паслядоўнага будаўніцтва міру ў гэтых краінах шляхам перамоваў, каб спыніць усе формы варожасці. Папа ўзнёс малітву аб ліванскім народзе, каб у сваіх цяжкасцях і пры падтрымцы міжнароднай супольнасці ён не губляў надзеі.
Таксама Святы Айцец маліўся аб дары трывалага і стабільнага міру ў былых савецкіх рэспубліках:
«Няхай умацуе Сын Усявышняга прыхільнасць міжнароднай супольнасці і ўцягнутых краін прадаўжэнню рэжыму спынення агню ў Нагорным Карабаху, а таксама ва ўсходніх абласцях Украіны, і спрыяць дыялогу, — адзінаму шляху, які вядзе да міру і да прымірэння».
У канцы святочнага звароту Папа Францыск сказаў:
«Ісус нарадзіўся ў хляве, але быў ахутаны любоўю Панны Марыі і святога Язэпа. Нарадзіўшыся ў плоці, Сын Божы асвяціў сямейную любоў. Я думаю цяпер пра сем'і: пра тых, хто сёння не могуць уз'яднацца, а таксама пра тых, хто вымушаны заставацца дома. Хай для кожнага Раство стане шанцам зноўку ўбачыць у сям'і калыску жыцця і веры, месца ветлівай любові, дыялогу, прабачэння, брацкай салідарнасці і сумеснай радасці, крыніцай міру для ўсяго чалавецтва. Я жадаю ўсім шчаслівага Раства!»