Забароненыя кнігі, «палёгкі» для асуджаных і новыя «фармаванні». Хронікі рэпрэсій 26 лютага
У Беларусі папоўнілі спіс забароненай літаратуры — цяпер у ім 241 пазіцыя. Палітвязням на «хатняй хіміі» прапануюць пераход на папраўчыя работы з утрыманнем да 25% заробку. На межах з ЕС працягваюцца допыты і затрыманні. Менеджара IT-кампаніі асудзілі за ўдзел у пратэстах, а МУС прызнала новым «экстрэмісцкім фармаваннем» «Беседу Форватера».
У Беларусі абнавілі спіс забароненай літаратуры
Міністэрства інфармацыі дадало 16 кніг у пералік друкаваных выданняў, якія, паводле ведамства, «здольныя нанесці шкоду нацыянальным інтарэсам», піша «Люстэрка».
Рашэнне прынялі па выніках пашыранага пасяджэння Рэспубліканскай камісіі па ацэнцы сімволікі, атрыбутыкі і інфармацыйнай прадукцыі. Удзельнічаў і Грамадскі савет па маральнасці.
У абноўлены пералік увайшлі:
«Улыбка — пилигрим души: стихи, переводы» — Уладзімір Харошка;
«БДСМ. Бесконечная доброта, сострадание и милосердие» — Аляксандр Чашчын;
«Твоя Мари» — Марыянна Крамм;
«Уроки во грехе» — Пэм Гудвін;
«Дневник каннибала. История японского людоеда, который вместо срока получил славу» — Іссэй Сагава;
«Нация прозака» — Элізабет Вуртцэль;
«Семь лепестков» — Сяргей Кузняцоў;
«Амнезия души» — Таццяна Коган;
«Лампа Мафусаила, или Крайняя битва чекистов с масонами» — Віктар Пялевін;
«Прошу, убей меня! Подлинная история панк-рока в рассказах участников» — Легс Макніл, Джылліяан Маккейн;
«Песнь Ахилла» — Мадлен Мілер;
«Лес мертвецов» — Жан-Крыстоф Гранжэ;
«Освобождение» — Патрык Нес;
«Абсолютист» — Джон Бойн;
«Изысканный труп» — Попі Брайт;
«Фистула» — Арцём Серабраўкоў.
Чым канкрэтна кнігі «нашкодзілі нацыянальным інтарэсам», афіцыйна не тлумачыцца. Кіраўніца камісіі Лілія Ананіч заявіла, што Беларусь з’яўляецца «ўзорам сацыяльнай справядлівасці» і адстойвае «традыцыйныя каштоўнасці», якія не ўбудоўваюцца ў «глабалісцкі парадак». Паводле яе, «ментальная агрэсія» — складнік гібрыднай вайны супраць краіны.
На 26 лютага ў спісе забароненых кніг — 241 пазіцыя. У пераліку «экстрэмісцкіх матэрыялаў» — больш за 9 тысяч аб’ектаў.
Беларусам на «хатняй хіміі» прапануюць папраўчыя работы
«Нашай Ніве» вядома як мінімум пра пяць выпадкаў такіх прапановаў. Гаворка пра людзей, асуджаных па палітычных справах і накіраваных на «хатнюю хімію». Сярод выпадкаў — як Мінск, так і невялікія райцэнтры.
Папраўчыя работы не азначаюць прымусовай фізічнай працы. Чалавек працягвае працаваць на сваім месцы, але дзяржава ўтрымлівае ад 10% да 25% заробку. Ва ўсіх вядомых выпадках людзей папярэджвалі, што будуць утрымліваць максімальныя 25%.
Пры гэтым адмяняюцца іншыя абмежаванні: няма строгага графіку знаходжання дома і пастаянных міліцэйскіх праверак.
Допыты і затрыманні на мяжы з ЕС
За апошнія паўгода праваабаронцы фіксуюць рэгулярныя допыты і затрыманні на пунктах пропуску паміж Беларуссю і краінамі ЕС, а таксама Расіяй.
Падставай для пераследу становяцца:
фота з пратэстаў;
данаты;
каментары ў сацсетках;
«экстрэмісцкія» рэпосты;
БЧБ-сімволіка;
фота з акцый салідарнасці за мяжой.
Часта на размовы адпраўляюць людзей, уключаных у базу сілавікоў «БЕСпорядки», куды ўнесеныя даныя затрыманых пасля 2020 года.
Тэлефоны аглядаюць дэталёва, уключна з архівамі за 2020 год. Пры выяўленні «экстрэмізму» людзей змяшчаюць у ІЧУ ў бліжэйшых гарадах, прызначаюць штрафы або адміністрацыйны арышт, а ў асобных выпадках узбуджаюць крымінальныя справы.
Менеджара IT-кампаніі асудзілі за ўдзел у пратэстах
35-гадовага Аляксандра Лабузава судзілі ў Мінскім гарадскім судзе па ч. 1 арт. 342 і ч. 1 і 2 арт. 361-4 КК — удзел у пратэстах і «садзейнічанне экстрэмісцкай дзейнасці».
Раней ён працаваў у рознічным гандлі ў Светлагорску, пасля — у «Атлант-М» у Мінску, а з 2023 года быў старэйшым менеджарам па рабоце з кліентамі ў Noventiq Belarus — буйным правайдары IT-рашэнняў і сэрвісаў, піша «Наша Ніва».
Дакладны прысуд невядомы, але, імаверна, гаворка ідзе пра «хатнюю хімію».
Новае «экстрэмісцкае фармаванне» — «Беседа Форватера»
24 лютага МУС прызнала «Беседу Форватера» экстрэмісцкім фармаваннем.
У пералік датычных уключылі 19-гадовых Дзмітрыя Зуева і Уладзіслава Бутвянкова. Паводле сацсетак, яны затрыманыя — іх старонкі не абнаўляюцца з канца 2025 года. Палітычнага кантэнту на старонках не было; вядома, што Бутвянкоў цікавіўся гістарычнай рэканструкцыяй і падпісваўся на беларускія сайты.
Раней Бутвянкова ўжо ўносілі ў спісы датычных да «экстрэмісцкіх фармаванняў» Sandӓr і «Барысфен».