Аблава на вулічных музыкаў: на Зыбіцкай забралі адразу тры гурты (дапоўнена)

Сілавікі правялі ў Мінску новую аблаву на вулічных музыкаў, з Зыбіцкай забралі адразу тры гурты.

Ілюстрацыйнае фота

Ілюстрацыйнае фота

Увечары 18 жніўня на мінскай тусовачнай вуліцы Зыбіцкая АМАП затрымаў адразу некалькі музычных гуртоў, што ніякіх песень «пра палітыку» не выконвалі, пра гэта рэдакцыі «Зерк*ло» паведаміў чытач.

Паводле яго слоў, АМАП забраў з Зыбіцкай адразу тры розныя гурты — іх затрымалі без папярэджання і адвезлі ў РУУС. Адзін з калектываў — кавер-група «Best Band Sound», якая грала на вуліцы са сваёй апаратурай.

Да іх падышлі, спыталі, хто старэйшы, і забралі траіх адразу, — распавёў сведка. Адметна, што музыкі не выконвалі «нічога палітычнага».

У верасні 2020 года музыкаў «Best Band Sound» ужо затрымлівала міліцыя — яны гралі «Разбуры турмы муры» ў пераходзе на плошчы Якуба Коласа ў Мінску. Тады музыкаў пакаралі адміністрацыйным арыштам: альтыстка Ніна Матушкіна і гітарыст Вадзім Бурак атрымалі па 13 сутак, бас-гітарыст Яраслаў Бандарчук — 12 сутак. Іх судзілі паводле «народнага» артыкула 23.34 КаАП — за парушэнне парадку арганізацыі або правядзення масавых мерапрыемстваў.


Варта згадаць пра нядаўняе гучнае затрыманне на Зыбіцкай. 3 жніўня на тэрасе бара «Банкі-Бутэлькі» прайшоў вулічны канцэрт спявачкі Мерыем Герасіменка. Сярод песень, якія яна выканала, былі і творы ўкраінскага гурта «Акіян Эльзы».

Неўзабаве ў бар прыйшлі з праверкамі з санстанцыі і МНС. Уладальніка бара Андрэя Жука затрымалі на 30 сутак, а Мерыем Герасіменка — на 15. Зрэшты, ва ўпраўленні культуры Мінгарвыканкама сцвярджалі, што арышты не звязаныя з песняй, якую выканала Мерыем Герасіменка. Прычына ў тым, што «дадзенае мерапрыемства не было санкцыянавана ні з адным органам дзяржкіравання». А 1 жніўня нібыта ўступіла ў сілу пастанова, па якой установы, дзе выступаюць артысты, напрыклад, бары і рэстараны, павінны быць уключаны ў рэестр арганізатараў культурна-відовішчных мерапрыемстваў.

Пад вечар 19 жніўня стала вядома, што ўзятых на Зыбіцкай музыкаў пратрымалі некалькі гадзін у РУУС і адпусцілі. Відаць, нават без пратаколаў ці папярэджанняў.