Брэстаўчанін пайшоў у краму і аблаяў там Лукашэнку — прысудзілі 3 месяцы арышту

15 снежня ў судзе Ленінскага раёна Брэста вынеслі прысуд па справе аб публічнай абразе Лукашэнкі. Разгляд гэтай справы пачаўся яшчэ ў кастрычніку. Абвінавачаным па ёй праходзіць Васіль Панасюк. Мужчыну абвінавачваюць у здзяйсненні злачынства па ч. 1 арт. 368 КК РБ («Абраза прэзідэнта Рэспублікі Беларусь»).

Судовае пасяджэнне вёў суддзя Святаслаў Каліна.
Падчас разгляду матэрыялаў справы стала вядома, што 10 чэрвеня гэтага года прыкладна ў 11.00 Васіль Іванавіч прыйшоў у краму па алкаголь. Але там яму алкаголю не прадалі. Мужчына вырашыў не здавацца, таму пайшоў у бар. Там ён узяў піва, але плаціць за яго чамусьці адмаўляўся. Лагічна, што з боку бармэна да мужчыны ўзніклі пытанні. Мяркуючы па ўсім, яны Васілю Іванавічу вельмі не спадабаліся. У выніку мужчына стаў гучна абурацца — славесна «прыляцела» і супрацоўнікам бара, і існуючай дзяржаўнай уладзе, і нават Лукашэнку.
Усё гэта адбывалася на вачах у аднаго студэнта, які, па сутнасці, і стаў галоўным сведкам па гэтай справе. Падчас судовага пасяджэння высветлілася, што хлопец нават запісаў усё тое, што адбывалася ў бары, на аўдыё.
Вядома і тое, што аблаяўшы бармэнаў, уладу і Лукашэнку, мужчына прыстаў да двух хлопцаў у бары і таксама стаў скардзіцца на дзеючага кіраўніка краіны. Аднак тут побач зноў апынуўся той самы студэнт і прапанаваў Васілю распавядаць усё яму, а не гэтым двум хлопцам.
Нарэшце, гэты ж студэнт выклікаў на абвінавачанага міліцыю.
У якасці доказу злачынства на судзе былі агучаныя тыя самыя аўдыёзапісы: дыялог з прадаўцом, абразлівыя фразы ў адрас Лукашэнкі, званок студэнта-сведкі ў міліцыю…
На судовым пасяджэнні прысутнічала і прадавачка з крамы, да якой па алкаголь прыходзіў абвінавачаны. Жанчына патлумачыла, што канкрэтыкі таго здарэння яна не памятае, «бо тых, хто абураецца ўладай, прыходзячы ў краму, занадта шмат».
На аўдыёзапісах, якія праслухоўвалі ў судзе, можна было пачуць, да прыкладу, такія фразы: «97% супраць яго», «мянты даўно згодныя з народам», «яны не вінаватыя, яны хутка тэрмін свой адбудуць, а адбываюць за праўду», «пенсіянераў ён пакрыўдзіў усіх, с..а, ён дыктатар»...
Пасля праслухоўвання аўдыёзапісу суддзя спытаўся у абвінавачанага: «Гэта ваш голас?»
«Напэўна, мой», — разгублена адказаў Васіль Іванавіч. Ён жа растлумачыў суду, што тых падзей ён практычна не памятае. Як даваў паказанні следчаму — таксама. Таксама мужчына акцэнтаваў увагу на тым, што ў яго праблемы з сэрцам, была мазгавая траўма, здараюцца правалы ў памяці, а пасля таго выпадку ён наогул добраахвотна пайшоў лячыцца ў наркадыспансер.
Абвінавачаны цалкам прызнаў сваю віну і запэўніў, што на самой справе добра ставіцца да Лукашэнкі, бо той даў яму пенсію.
Пракурор запытаў для абвінавачанага тры месяцы арышту.
15 снежня суд вынес прысуд. Васіля Панасюка прызналі вінаватым у здзяйсненні злачынства па ч. 1 арт. 368 КК РБ («Абраза прэзідэнта Рэспублікі Беларусь») і прысудзіў тры месяцы арышту. У бліжэйшы час мужчына адбудзе сваё пакаранне. Пад варту ў зале суда яго не ўзялі.
spring96.org