Штрафы за незаконную высечку хвойных дрэў могуць скласці ад 900 тыс. да 54 млн. рублёў

Дзяржаўная лясная ахова пераходзіць на ўзмоцнены рэжым аховы лясоў для недапушчэння незаконных высечак хвойных дрэў, паведаміла БелаПАН прэс-служба Міністэрства лясной гаспадаркі. 



Фота з сайта timenews.in.ua

У лясах выстаўленыя пасты і на рэгулярнай аснове праводзяцца рэйды па выяўленні парушальнікаў. Для больш эфектыўнай працы рэйдавыя мерапрыемствы праводзяцца сумесна з прадстаўнікамі Дзяржаўнай інспекцыі па ахове жывёльнага і расліннага свету пры прэзідэнце і супрацоўнікамі Дзяржаўтаінспекцыі. На аўтадарогах выстаўлена больш за 300 кантрольных пастоў. Асаблівая ўвага будзе надавацца ўчасткам лесу каля вёсак, хвойным маладнякам. Прадоўжацца рэйдавыя мерапрыемствы ўсе навагоднія святы. 

Штрафы парушальнікам-фізасобам могуць скласці ад 5 да 50 базавых велічынь (ад 900 тыс. да 9 млн. рублёў). Індывідуальным прадпрымальнікам у выпадку парушэння прыйдзецца выплаціць ад 20 да 200 базавых велічынь (ад 3 млн. 600 тыс. да 36 млн. рублёў), юрыдычным асобам — ад 50 да 300 базавых велічынь (ад 9 млн. да 54 млн. рублёў). 

Паводле інфармацыі прэс-службы, у пераднавагодні перыяд мінулага года было выяўлена 17 выпадкаў незаконных высечак хвойных дрэў, спагнана штрафаў на 2,5 млн. рублёў. 

Як паведамлялі, з 22 снежня разгортваецца перадсвяточны гандаль навагоднімі дрэвамі. Лясгасы будуць рэалізаваць ёлкі, хвоі, навагоднія букеты, а таксама дэкаратыўныя дрэвы ў кадках. Набыць дрэвы можна і ў лясніцтвах, дзе цэны традыцыйна будуць меншыя, чым на гандлёвых кропках. Кантактныя тэлефоны і адрасы лясгасаў і лясніцтваў можна знайсці праз сайт Міністэрства лясной гаспадаркі ў інтэрнэце або непасрэдна праз сайты лясгасаў.
Марына Носава, БелаПАН