Пад зваротам за спыненне катаванняў палітвязня Жамчужнага падпісалася больш за 160 чалавек

Падпісанты патрабуюць ад міністра МУС Ігара Шуневіча навесці парадак у Горацкай калоніі ПК-9 і прыцягнуць вінаватых у катаваннях да адказнасці.

«Пасля пераводу Міхаіла Жамчужнага ў  калонію ПК-9  у Горках, адміністрацыяй ПК-9 была  зроблена спроба  змясціць Міхаіла у атрад нумар 13, дзе, як вядома ад былых зняволеных, знаходзяцца вязні, якія маюць нізкі крымінальны статус, што па «крымінальных законах» у турме  падобна смерці. Міхаіл адмовіўся  і за непадпарадкаванне яго адправілі ў ШЫЗА. Пасля адсідкі тэрміна яму ізноў далі загад ісці ў той самы атрад, ізноў адмовіўся – ізноў ШЫЗА , і ізноў, і так 14 разоў . Агулам з пачатку жніўня Міхаіл Жамчужны правёў у ШЫЗА  каля 100 сутак.  6 студзеня 2018 Міхаіл Жамчужны быў пераведзены на адзін месяц у памяшкане камернага тыпу (ПКТ). Акрамя ўсяго, лісты, якія Міхаілу прыйшлі з волі падчас яго знаходжання ў ШЫЗА, супрацоўнікі ПК-9 аддалі без капэртаў , то бок без адваротных адрасоў, тым самым  груба, цынічна парушыўшы правы зняволенага», — гаворыцца ў звароце.
Адкрыты ліст будзе адпраўлены як у Міністэрства ўнутраных справаў, так і ў Адміністрацыю прэзідэнта і Генеральную пракуратуру. Калі ж міністэрства не ў стане навесці парадак у калоніі, пішуць аўтары зварота, кіраўнік ведамства мусіць падаць у адстаўку.
Горацкая калонія ПК-9 даўно мае дурную славу самай страшнай калоніі, у якой аказваецца бязмежны ціск на асуджаных. У апошнія гады калонія выкарыстоўвалася як спосаб ціску на палітычных вязняў: там адбывалі свой тэрмін зняволення Зміцер Дашкевіч, Васіль Парфянкоў, Мікалай Дзядок, Аляксей Мілюкоў да якіх таксама былі ужытыя спробы падобных катаванняў «статусамі». 
Падпісацца пад зваротам можна тут.