«Як можна адзначаць Дзень незалежнасці, калі ўвесь гэты год адбываецца гандаль нашым суверэнітэтам?»

Святлана Ціханоўская зрабіла заяву з нагоды 3 ліпеня.

«3 ліпеня 1944 года Мінск быў вызвалены ад акупацыі. Ці маглі нашы дзяды ў сорак чацвёртым уявіць, што праз 77 гадоў Беларусь зноў апынецца пад акупацыяй — але ўжо не чужой дзяржавай, а сваёй?» — цытуе Святлану Ціханоўскую БелаПАН.

Палітык падкрэсліла, што краіне патрэбныя нацыянальныя святы. Аднак заўважыла, што «нашы продкі змагаліся за тое, каб мы маглі жыць у моцнай і квітнеючай свабоднай краіне».

Сёння ж, сцвярджае Ціханоўская, мы назіраем «разруху, якія абвальваюцца масты, знікае электрычнасць, памяншаюцца зарплаты і гатовыя турмы для ўсіх нязгодных».

Яна не разумее, як можна адзначаць Дзень незалежнасці, калі «ўвесь гэты год адбываецца гандаль нашым суверэнітэтам? І няўжо праўда можна паверыць, што феерверкі і канцэрты здольныя адцягнуць нас ад крызісу ў краіне?»