«Калі і я з’еду, то хто застанецца?» Падрабязнасці затрымання нашаніўца Андрэя Дынько

Сярод затрыманых у чацвер супрацоўнікаў «Нашай Нівы» — галоўны рэдактар «Нашай гісторыі», а таксама дзіцячых часопісаў «Дуду», і «Асцярожна: дзеці!» Андрэй Дынько. Яго жонка Наталля Дынько ў сваім фэйсбуку напісала, як праходзіў ператрус у іх дома.

«У вашего мужа очень большая библиотека, мы тут надолго». Агулам прабылі гадзіны 4,5. Я толькі зараз патроху аднаўляю сувязь, — напісала Наталля Дынько. — 

Забралі мае тэлефоны і працоўны ноўт. Нават зараз пішу з тэлефона, на якім западаюць літары. Але гэта ўсё дробязі.

Я не ведаю, што напісаць пра Андрэя. Ён мог з'ехаць, але застаўся. Бо любіць Беларусь. Мы з ім размаўлялі на гэту тэму пасля разгрому тутбая.

Тады ён сказаў: «Пачобуту прапанавалі з'ехаць, але ён застаўся». І яшчэ пахаванне Ашурка яго спыніла, так мала там было людзей, бо шмат хто ўжо з'ехаў.

«Калі і я з'еду, то хто застанецца?»