Кастусь Каліноўскі і нацыятворчы працэс у Беларусі
Прэзентацыя кнігі “Кастусь Каліноўскі і нацыятворчы працэс у Беларусі” адбылася вечарам 8 лютага ў кнігарні ЛогвінаЎ. Яе ладзілі ўдзельнікі міжнароднай канферэнцыі, прысвечанай падзеям нацыянальна-вызвольнага паўстання 1863 года, з матэрыялаў якой уласна і складаўся зборнік.
Ірына Дубянецкая
Выступае Алесь Краўцэвіч
Прамаўляе Андрусь Унучак
Андрэй Казакевіч
Алесь Смалянчук
Пра новую кнігу наведнікам кнігарні распавядалі навуковы рэдактар зборніка, доктар гістарычных навук Аляксандр Смалянчук, карэктар зборніка, доктар філасофіі Ірына Дубянецкая, удзельнікі канферэнцыі і аўтары артыкулаў гісторык, археолаг, доктар гістарычных навук Алесь Краўцэвіч, кандыдат гістарычных навук Андрусь Унучак, а таксама дырэктар Інстытута палітычных даследаванняў “Палітычная сфера”, прадстаўнік Беларускага калегіума, з дапамогай якога была арганізаваная прэзентацыя, Андрэй Казакевіч.
Як патлумачыла Ірына Дубянецкая, міжнародная навуковая канферэнцыя, што прайшла ўвесну 2014 года ў Лондане, атрымалася вельмі змястоўнай і выніковай. Таму было прынятае рашэнне пры падтрымцы згуртавання беларусаў Вялікабрытаніі выдаць матэрыялы канферэнцыі, якія напісаныя досыць жывой мовай, асобнай кнігай.
Цягам двух гадзін гісторыкі распавядалі цікавыя факты з часоў нацыянальна-вызвольнага паўстання, стаўленне да асобы Кастуся Каліноўскага ў сучасных Польшчы і Літве, а таксама спрабавалі ў папулярнай форме прааналізаваць ролю асобы Кастуся Каліноўскага ў гісторыі і вобраза героя паўстання ў мастацтве і літаратуры для беларускага нацыятворчага працэсу.
“Менавіта цяпер у Беларусі вельмі інтэнсіўна адбываюцца працэсы фармавання нацыянальнай ідэнтычнасці. Гэтыя працэсы, а таксама асэнсаванне знакавых герояў, падзеяў, іх інтэрпрэтацыя ў гісторыі, літаратуры, масавай свядомасці можа адыгрываць ключавую ролю. Таму цяпер нам вельмі важна разабрацца са сваёй гісторыяй, прыўласніць сваю гісторыю, якая б яна ні была”, — патлумачыла актуальнасць тэмы паўстання 1863 года і яе герояў Ірына Дубянецкая.
Удзельнікі прэзентацыі мелі магчымасць набыць кнігу па спецыяльным кошце 70 тысяч рублёў. Крыху даражэй зборнік можна будзе набыць у кнігарні “ЛогвінаЎ” у іншыя дні.