Мінабароны РБ добраўпарадкавала пляцоўкі пад ракеты «Таполя». Справа выглядае на бескарысную
Беларускае Мінабароны займаецца добраўпарадкаваннем стартавых пляцовак пад ракетныя стратэгічныя комплексы «Таполя». Невялікі відэаролік пра гэта апублікавала прэс-служба ведамства.
«Мы знаходзімся на адной з пляцовак у раёне баявой стартавай пазіцыі, дзе калісьці размяшчаўся ракетны полк войскаў стратэгічнага прызначэння. У цяперашні час тут праводзяцца работы па добраўпарадкаванні тэрыторыі пасля зімовага перыяду, а таксама іншыя мерапрыемствы, накіраваныя на падтрыманне наяўнай інфраструктуры ў належным стане.
Што тычыцца магчымасці выкарыстання аб'ектаў стратэгічнага прызначэння, што захаваліся ў спадчыну з часоў Савецкага Саюза, можна з упэўненасцю сказаць, што пры неабходнасці яны аператыўна могуць быць прыгатаваныя да ўжывання. На дадзены момант наша задача складаецца ў тым, каб забяспечыць у першую чаргу захаванасць і падтрыманне ў гатоўнасці да выкарыстання інфраструктуры, якая засталася ў спадчыну ад базы ракетных войскаў стратэгічнага прызначэння, якая знаходзілася тут», — кажа неназваны мужчына ў ваеннай форме са схаваным тварам.
У роліку таксама прадэманстраваныя бетанаваныя пляцоўкі ў лесе і памятная шыльда, якая паказвае на 56-ты ракетны полк і 1692-ю рамонтна-тэхнічную базу РВСН.
56-ты полк быў сфарміраваны ў 1961 годзе. Ён дыслакаваўся ў раёне населеных пунктаў Шарашова і Ясень пад Пружанамі. Першапачаткова ў палку павінны былі быць два наземных і адзін шахтавы дывізіёны. Аднак шахтныя аб'екты не былі пабудаваныя, і ў штаце палка ў выніку засталіся два наземных дывізіёна. Пазней полк быў перадыслакаваны ў Зімавічы. Падраздзяленне несла баявое дзяжурства спачатку з ракетамі Р-12, затым пасля зняцця іх з узбраення ў сярэдзіне 1980-х было пераведзена на ракетныя комплексы РСД-10 Піянер-К (SS-20). «Таполя» з'явіліся ў ім у пачатку 1990-х. Полк бы зняты з баявога дзяжурства ў 1993 годзе, выведзены ў Расію і расфармаваны ў 1994 годзе.
Ракетны комплекс «Таполя» мае 3-ступеністую цвёрдапаліўную ракету, якая размяшчаецца на самаходным шасі. Стартавая маса ракеты 45,1 тон, карысная маса — 1,2 тон. Максімальная далёкасць палёту — 11 тыс. км, дакладнасць — 150 метраў. Ракета мае адну боегалоўку магутнасцю не менш за 550 кілатон.
Нагадаем, выступаючы ў канцы сакавіка Аляксандр Лукашэнка заявіў, што аддаў распараджэнне прывесці ў парадак стартавыя пляцоўкі для «Таполяў». Паводле яго слоў, пры неабходнасці ён разам з Пуціным можа прыняць рашэнне аб размяшчэнні ў Беларусі стратэгічнай ядзернай зброі. Пакуль у нашу краіну прывязуць тактычную ядзерную зброю.
Справа добраўпарадкавання пляцовак пад «Таполі» выглядае марнай, таму што гэтая ракета — даўно маральна састарэла. Па звестках на канец 2012 года, у Расіі на баявым дзяжурстве знаходзілася 60 ракет «Таполя-М» шахтавага (гэта азначае, неперамяшчальнага ў Беларусь) і 18 ракет мабільнага базавання.
Такім чынам, Мінабароны патраціла бюджэтныя грошы на пляцоўкі пад ракеты, якія ў Беларусі амаль на 100% ніколі не з’явяцца, бо яны састарэлі ўжо не менш як 10 гадоў таму.
