«Роля чалавека-фаталіста». Чалы — аб галоўным страху Лукашэнкі і чырвонай лініі, якая ўжо пройдзеная

Незалежны эканаміст Сяргей Чалы — аб важных момантах «Вялікай размовы».

Фота «Еўрарадыё».

Фота «Еўрарадыё».

У чарговым стрыме «Чалы.Live» незалежны эканаміст распавёў аб уласных ўражаннях ад васьмігадзіннага спіча Аляскандра Лукашэнкі, піша «Салідарнасць».

— Вельмі цікава было ўбачыць прамое пацверджанне, з яго ж вуснаў, яго самага галоўнага страху: «Яны мяне хочуць у Міжнародны трыбунал, яны мяне хочуць у Гаагу!»

Эканаміст нагадаў, што пра гэта Лукашэнка з відавочным страхам казаў яшчэ ў маі. Цяпер жа ён спрабаваў выглядаць інакш:

— Цяпер ён спрабаваў гуляць ролю чалавека-фаталіста. Маўляў, мне ўжо як бы ўсё роўна. Я сваё жыццё ўжо пражыў і што мужык павінен зрабіць — зрабіў. Расстраляюць не расстраляюць, Гаага не Гаага, санкцыі не санкцыі…

Чалы звярнуў увагу на тое, што падчас «размовы» Лукашэнка некалькі разоў агучыў заклік да дыялогу:

— Маўляў, хлопцы, схамяніцеся! Ачніцеся, ачніцеся! (Такі ўзмацняльны абарот). Нам трэба ўзяць галаву ў рукі, нам трэба сесці за стол і разам вырашаць, як з гэтай сітуацыі выходзіць. Мы перайшлі чырвоную лінію, але не загналі сябе ў кут.

На думку Чалага, гэты заклік звернуты не толькі да знешніх гульцоў, але і да самога сябе: не выключана, што Лукашэнка ўсвядоміў сваю памылку, у першую чаргу гісторыю з каронавірусам, якая стала адной з ключавых прычын ўспышкі пратэстаў у краіне.

Але пры гэтым ён спадзяецца, што не ўсё яшчэ страчана, што ў кут яго яшчэ не загналі. І ён не падзеліць лёс Кадафі і Хусэйна.