Часовая павераная ў справах ЗША пры АБСЕ: «Лукашэнка і надалей будзе несці адказнасць за свае дзеянні»

Кортні Острыен распавяла пра далейшае ўзмацненне санкцыйнага ціску на Лукашэнку і яго атачэнне.

Такія заявы часовая павераная ў справах ЗША пры АБСЕ Кортні Острыен зрабіла, выступаючы на пасяджэнні Пастаяннай рады Арганізацыі бяспекі і супрацоўніцтва ў Еўропе.

«Рэжым несправядліва ўтрымлівае больш за 600 палітычных зняволеных. У спробе прымусіць замаўчаць жыццёва важныя незалежныя галасы ўлады правялі ператрусы, зачынілі дзьверы і вылучылі палітычна матываваныя абвінавачанні ў адрас СМІ і НДА», — заявіла Острыен у прамове, прысвечанай гадавіне прэзідэнцкіх выбараў у Беларусі.

Яна падкрэсліла, што беларускія ўлады ўсё часцей запалохваюць і пераследуюць беларусаў за мяжой, прывёўшы ў якасьці прыкладаў прымусовую пасадку рэйсу «Ryanair» 4978 з мэтай арышту беларускага незалежнага журналіста Рамана Пратасевіча, спробы запалохаць Літву і іншыя суседнія з Беларуссю краіны ЕС з дапамогай арганізаванага патоку нелегальных мігрантаў на сумежныя тэрыторыі, а таксама спробу прымусова адправіць на радзіму спартсменку Крысціну Ціманоўскую.

«Гэтыя транснацыянальныя рэпрэсіі адлюстроўваюць абуральнае ігнараванне міжнародных нормаў. Транснацыянальныя рэпрэсіі недапушчальныя і павінны быць спыненыя. Рэжым Лукашэнкі і надалей будзе несці адказнасць за свае нядобрасумленныя дзеянні», — заявіла часовая павераная ў справах ЗША пры АБСЕ.

Санкцыі, на думку Острыен, «дэманструюць рашучасць заклікаць рэжым Лукашэнкі да адказу за парушэнні правоў чалавека, карупцыю і атакі на дэмакратыю.

Яна адзначыла, што Злучаныя Штаты яшчэ раз заклікаюць афіцыйны Мінск спыніць рэпрэсіі супраць прадстаўнікоў грамадзянскай супольнасці, апазіцыі, СМІ, спартсменаў, студэнтаў, юрыстаў і іншых грамадзян і неадкладна вызваліць усіх палітычных зняволеных. Яна зноў заклікала Лукашэнку прыняць прапанову АБСЭ аб садзейнічанні нацыянальнаму дыялогу, які вядзе да свабодных і справядлівых выбараў пад міжнародным назіраннем.

9 жніўня ЗША пашырылі санкцыі супраць Беларусі: у новым санкцыйным спісе больш за 20 фізічных асобаў, Нацыянальны алімпійскі камітэт, Следчы камітэт, кампаніі і прадпрыемствы, у тым ліку «Беларуськалій».
Паводле «Свабоды».