Заснавальніку "Платформы" хочуць павялічыць турэмны тэрмін
Пра гэта Міхаіл Жамчужны паведаміў у апошнім лісце сваім паплечнікам.
Зместам ліста падзялілася ўдзельніца праваабарончай групы "За Волю" Ганна Шапуцька.
"Я так доўга не пісаў і не атрымліваў лістоў таму, што мяне на ўсе суды, на 30 сутак адвялі ў карцэр. Там перапіскі ды іншых ільготаў няма. [ ... ] Зараз пракурор унёс пратэст "за мяккасць прысуду" і хоча мне 7 гадоў (максімальна магчымы тэрмін. Я ў адказ падаў касацыйную скаргу ў Вярхоўны суд з патрабаваннем вызваліць мяне ад крымінальнай адказнасці", — піша Міхаіл Жамчужны. — "Настрой як заўсёды баявы. Адчуваю за плячыма Вашу падтрымку і ўмацаваны Богам. Лічу гэта сваёй працай і паступіў бы сапраўды гэтак жа яшчэ раз. Па справе больш пісаць не магу, бо ліст не дойдзе, як і ўсе папярэднія... Суд праходзіў, як і ў Андрэя Бандарэнкі, адвакат працаваў выдатна, але нават дзясятак адвакатаў нічога не змянілі б. Калі б не ы і не вашыя малітвы і акцыі, я не выключаю цяпер, што апынуўся б на месцы Захаранкі. Нягледзячы на свой узрост, збіраюся перажыць рэжым і выставіць яму рахунак не толькі за сябе, але і за многіх іншых".
На здароўе Жамчужны не скардзіцца, стараецца дапамагаць іншым вязням абараняць свае правы.
Нагадаем, заснавальніка праваабарончай установы "Платформа" абвінавацілі ў падбухторванні да наўмыснага раскрыцця звестак, якія складаюць службовую тайну, асобаю якая мае да яе доступ; у незаконным набыцці ў мэтах збыту і збыццё спецыяльных тэхнічных сродкаў, прызначаных для сакрэтнага атрымання інфармацыі; у замаху на дачу хабару. У сукупнасці вязня прысудзілі да 6 гадоў турмы.
Праваабарончая група "За Волю" абвясціла Міхаіла Жамчужнага палітвязнем, кіруючыся прэзумцыя невінаватасці, закрытым характарам судовага працэса; непрызнаннем
сваёй віны Міхаілам і відавочна палітычнымі матывамі яго арышту.