«Вершы з-за кратаў» — з'явіўся вялікі віртуальны зборнік паэзіі беларускіх палітвязняў

Праект паўстаў дзякуючы ініцыятыве «Вольныя паштоўкі» і Народнай амбасадзе Беларусі ў Бразіліі.

Стваральнікі збіраюць вершы палітзняволеных і перакладаюць іх на розныя мовы. Ужо можна пачытаць творы па-беларуску, па-англійску і па-партугальску. Таксама на сайце размешчана інфармацыя пра палітвязняў і працуе функцыя даслаць ліст анлайн.
«Вершы з-за кратаў» мусяць натхняць больш людзей на падтрымку тых, хто рэпрэсаваны за свае каштоўнасці, але з гонарам праходзіць нават самыя цяжкія выпрабаванні.
Можна зрабіць данат на BYS*L, усе сабраныя сродкі пойдуць на перадачы ў турмы. За ахвяраванні вы атрымаеце тэматычныя падарункі.
Нагадаем, што на сёння ў Беларусі 1443 палітзняволеныя, з іх больш за 80 — дзеячы культуры.
Пазнаёмім вас з некаторымі творамі.
Максім Знак
Пароль: «Тук-тук!», «Тук-тук!» – як водгук: Жалеза стук Па калідорах. «Аддаў!» – «Прыняў!» «Як сам?» – «Нармальна». Ключ і сцяна… Фенаменальна! «Тук-тук!» – «Ідзем!» «Тук-тук!» – «Хавайце!» «Ў сцяну глядзець! Не размаўляйце!» «Тук-тук!» — «Тук-тук!» Па калідорах. І сёння стук Такі ж, як ўчора.
Ігар Лосік
Хай скруха самотных дзён Нікому ня будзе вядома, Хай будзе турма, як сон: Прачнуся — і зноўку дома.
Андрэй Кузнечык
Цёплы вецер дарогі высушыў І паклікаў удалеч вырушыць. Затрашчалі ў зялёных шатах Абазнаных турыстаў чаты. Выхваляюцца лебедзь з качарам, Як у выраі парыбачылі, І расказваюць качкі курам Пра распродажы і шоп-туры. Размаўляюць шпакі з сініцамі Пра круізы паміж сталіцамі. Пракаўтнуўшы хот-фрог балотны, Рэкламуюць буслы курорты. Чаплі ж не прамінуць аказіі Папляткарыць пра спа ў аазісах. А стары трэвел-блогер грак Стыміць з глогу якісь лайфхак. У вяснушках вясна-вандроўніца На сігвэі па небе коціцца...