Сяргей Ціханоўскі атрымаў новы прысуд
Яго пакаралі за «злоснае непадпарадкаванне патрабаванням адміністрацыі папраўчай установы».
Фота: «Люстэрка»
Новае судовае разбіральніцтва адносна Сяргея Ціханоўскага, мужа лідара беларускай апазіцыі Святланы Ціханоўскай, пачалося 13 лютага. Яно праходзіла ў турме Жодзіна. Асуджанага да 18 гадоў калоніі Сяргея Ціханоўскага абвінавацілі ў злосным непадпарадкаванні адміністрацыі папраўчай установы. Аб выніках суда паведаміла прэс-служба Генеральнай пракуратуры.
Сяргея Ціханоўскага прызналі вінаватым па ч. 2 арт. 411 («Злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі, учыненае асобай, асуджанай за цяжкае і асабліва цяжкае злачынства») Крымінальнага кодэкса Беларусі.
Ціханоўскаму прызначылі пакаранне ў выглядзе пазбаўлення волі на тэрмін 1 год і 6 месяцаў. Па сукупнасці прысудаў яго пакаранне ў выглядзе пазбаўлення волі складае тэрмін у 15 гадоў 9 месяцаў 5 дзён з адбываннем 2 гадоў 5 месяцаў 18 дзён у турме, а астатняга тэрміну — у папраўчай калоніі ва ўмовах строгага рэжыму.
Сваю віну Сяргей Ціханоўскі не прызнаў.
Прысуд у законную сілу не ўступіў, можа быць абскарджаны і апратэставаны ў апеляцыйным парадку.
Нагадаем, у снежні 2021 года Сяргея Ціханоўскага ўжо прызналі вінаватым па ч. 1 арт. 293 («Арганізацыя масавых беспарадкаў»), ч. 3 арт. 130 («Распальванне сацыяльнай варожасці»), ч. 2 арт. 191 («Перашкода працы ЦВК»), ч. 1 арт. 342 («Арганізацыя дзеянняў, якія груба парушаюць грамадскі парадак»).
Яму прызначылі тады 18 гадоў калоніі ўзмоцненага рэжыму. У ліпені мінулага года Ціханоўскі быў этапаваны ў калонію № 15 у Магілёве.
Вядома, што ў жодзінскай турме Сяргея два месяцы бесперапынна ўтрымлівалі ў ШІЗА ў нечалавечых умовах.