Аляксандра Герасіменя: «Завочна вы мяне можаце нават расстраляць»

Сёння на адным з першых у гісторыі Беларусі завочных судоў адсутным на лаве падсудных стваральнікам Беларускага фонду спартыўнай салідарнасці Аляксандры Герасіменя і Аляксандру Апейкіну прысудзілі 12 гадоў зняволення. Герасіменя дала беларускім уладам адказ сапраўднай чэмпіёнкі.

Былую кіраўніцу БФСС і трохразовую алімпійскую чэмпіёнку Аляксандру Герасіменя і выканаўчага дырэктара фонду Аляксандра Апейкінапрызналі вінаватымі ў «закліках да санкцый і іншых дзеянняў, накіраваных на прычыненне шкоды нацыянальнай бяспецы Беларусі». 

Сутнасць абвінавачання палягае ў пераносе з Беларусі чэмпіянату свету па хакеі, чэмпіянату свету па пяцібор'і і чэмпіянату Еўропы па веласпорце на трэку (усе павінны былі прайсці ў 2021 годзе) — маўляў, менавіта Герасіменя і Апейкін вінаватыя ва ўвядзенні санкцый супраць рэжыму з боку міжнародных спартыўных структур. 

«Вельмі доўга нашы спартсмены хаваліся за прыдуманым прафесіяналізмам»: што ўплывае на выбар спартсмена і яго здольнасць гаварыць

У выніку суддзя Святлана Бандарэнка прызнала абодвух «вінаватымі» і вынесла «прысуд» тэрмінам па 12 гадоў пазбаўлення волі кожнаму: Герасімені — ва ўмовах агульнага рэжыму, Апейкіну — узмоцненага.

Каб задаволіць грамадзянскі пазоў на суму больш за 700 тысяч рублёў, суд арыштаваў маёмасць Герасімені, пра маёмасць Апейкіна не сказана ні слова.

Пад арышт трапляюць: кватэра ў Мінску з машына-месцам, аўтамабіль «Land Rover», два мабільныя тэлефоны, халадзільнік, два тэлевізары, акустычная сістэма, духавая шафа, 49 тысяч долараў з банкаўскага рахунку.

Аляксандра Герасіменя: Будзе свабоднай Украіна — зможа стаць свабоднай і Беларусь

Сама Аляксандра ўжо адрэагавала на гэты прысуд:

«Пачыталі прысуд, пасмяяліся, і працягнулі далей святкаваць. Як гаворыцца, завочна вы мяне можаце нават расстраляць», — напісала яна ў сваіх сацсетках.