Дачка лыжніка Сяргей Далідовіча стала чэмпіёнкай Польшчы. Летась сям'я з'ехала з Беларусі праз «палітыку»

Дачка лепшага лыжніка ў гісторыі незалежнай Беларусі Сяргея Далідовіча стала чэмпіёнкай Польшчы. Дар'я Далідовіч раней таксама была лыжніцай, але пасля эміграцыі перайшла ў біятлон і вось цяпер выйграла польскае першынство сярод юніёраў.

Пра чэмпіёнскі поспех дачкі Сяргей Далідовіч паведаміў у фэйсбуку.

У Беларусі Дар'я Далідовіч таксама была паспяховай і падавала надзеі. Але чыноўнікі пасля падзей 2020 года адхілілі яе ад спаборніцтваў разам з іншай лыжніцай Святланай Андрыюк.

Андрыюк тады заявіла, што прадстаўнікі лыжнай федэрацыі абвінавацілі яе ў тым, што яна — прыхільніца апазіцыі. Прычынай адхілення 17-гадовай Дарʼі Далідовіч стала грамадзянская пазіцыя яе бацькі і трэнера Сяргея Далідовіча.

Сам Сяргей Далідовіч у мінулым годзе звольніўся з нацыянальнага трэнерскага цэнтру, зведаў ціск за сваю грамадзянскую пазіцыю і сітуацыю ў беларускім спорце.

Сяргей Далідовіч удзельнічаў у пратэстах, неаднаразова выказваўся супраць гвалту, падпісаў ліст за сумленныя выбары, абараняў нацыянальную сімволіку і падтрымліваў палітвязняў. З таго часу ў яго ўзніклі сталыя праблемы з доступам да спаборніцтваў.

Беларускі спорт пасля пачатку вайны ва Украіне апынуўся амаль у татальнай міжнароднай ізаляцыі. Шмат нязгодных з палітыкай Лукашэнкі спартсменаў з'ехала з Беларусі.

Акрамя Дар'і Далідовіч, у Польшчы зараз паспяхова працягваюць карьеру лёгкаатлетка Крысціна Ціманоўская і лучніца Карына Казловіч.


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: