12-гадовую дачку расійскага рэжысёра зацкавалі ў школе за футболку «Не вайне»

Расійскі рэжысёр родам з Харкава Аксана Карас разам з 12-гадовай дачкой жыве і працуе ў Расіі. Яна распавяла, як падчас вайны ва Украіне яе дачка прыйшла ў школу ў футболцы з надпісам «Не вайне», але аднакласнікі асудзілі яе за антываенны заклік.

У інтэрв'ю Кацярыне Гардзеевай Карас са слоў сваёй дачкі распавяла, што напярэдадні ўварвання Расіі ва Украіну яе аднакласнікі абмяркоўвалі вайну і радаваліся верагодным баявым дзеянням. Пры гэтым сама дзяўчынка паспрабавала растлумачыць ім, што вайна — гэта дрэнна.

«Яна сама з імі паразмаўляла, напісала на футболцы «Не вайне». Настаўнікі нічога не сказалі, але з аднакласнікамі яна пасварылася. Яна спрабавала дастукацца да іх, растлумачыць, што не могуць быць 40 мільёнаў украінцаў нацыстамі, што сама яна напалову ўкраінка, што гэта дрэнна, паміраюць людзі», — распавяла Карас.

Таксама яна дадала, што аднакласнікі не пайшлі на кантакт з яе дачкой Кацярынай. Яны давялі яе да слёз, таму яна вырашыла перавесці дзіця на хатняе навучанне.

Аксана Карас — расійскі рэжысёр кіно і тэлебачання, сцэнарыст і мантажор, у мінулым тэлевядучая, журналістка. Найбольш вядомая па фільме «Добры хлопчык».

Паводле unian.net.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: