Абама гатовы змагацца з «Ісламскай дзяржавай» у Сірыі

Прэзідэнт ЗША Барак Абама распавёў аб плане барацьбы з баявікамі з «Ісламскай дзяржавы» у Сірыі і Іраку.



У сваім тэлезвароце да амерыканцаў ён паабяцаў, што тыя, хто пагражаюць Амерыцы, «нідзе не змогуць знайсці сховішча».

 ІД кантралюе значную частку Сірыі і Іраку, дзе мае намер стварыць халіфат.

Стратэгія Абамы супраць ІД 

«Мы будзем пераследваць тэрарыстаў, якія пагражаюць краіне, дзе б яны ні былі. Гэта азначае, што я без ваганняў пачну дзеянні супраць «Ісламскай дзяржавы» у Сірыі і Іраку», — заявіў Абама ў прамове перад гадавінай трагедыі 11 верасня.  Амерыканскі прэзідэнт прадставіў асноўныя пазіцыі свайго плана па барацьбе з джыхадзістамі. 
Ён абвясціў аб накіраванні 475 амерыканскіх вайскоўцаў у Ірак, аднак адзначыў, што яны не будуць браць непасрэднага ўдзелу ў баявых дзеяннях, а кансультаваць і навучаць мясцовых вайскоўцаў. 
«Мы не будзем уцягнутыя ў іншую наземную вайну», — заявіў Абама, дадаўшы, што ЗША не будуць дзейнічаць самастойна, а збяруць шырокую кааліцыю для барацьбы з «тэрарыстычнай пагрозай». 
ЗША працягнуць сістэматычна наносіць авіяўдары па пазіцыях баевікоў не толькі ў Іраку, але і ў Сірыі, а таксама акажуць падтрымку сірыйскай апазіцыі, якая змагаецца з «Ісламскай дзяржавай». 
«У барацьбе мы не можам спадзявацца на рэжым Асада, які тэрарызуе сваіх людзей: рэжым, які ніколі не верне легітымнасьць, якую ён страціў», — сказаў прэзідэнт ЗША. 
ЗША ўжо нанеслі больш за 150 авіяўдараў супраць ісламістаў у Іраку і забяспечылі зброяй іракскія і курдскія войскі. 
Прэзідэнт ЗША адзначыў, што сам мае паўнамоцтвы пачаць барацьбу супраць «Ісламскай дзяржавы», аднак усё ж лепш было б атрымаць падтрымку Кангрэса ў гэтым пытанні. 
Дзяржсакратар ЗША Джон Кэры знаходзіцца на Блізкім Усходзе, дзе спрабуе стварыць кааліцыю супраць ІД. 
Спадар Кэры ў сераду наведаў Ірак, дзе адзначыў планы новай улады прыцягнуць больш сунітаў ва ўрад і ўмацаваць адносіны з курдамі.
bbc.co.uk