Дарадца Пуціна: Прамысловасць Расіі стала працаваць сабе ў страту
Аб’ём закрэдытаванасці расійскага прамысловага сектару складае каля паловы ўсіх абаротных сродкаў прадпрыемстваў, заявіў на першым пасяджэнні часовай камісіі Рады Федэрацыі па маніторынгу эканамічнага развіцця дарадца прэзідэнта Расіі Сяргей Глазьеў.
Сяргей Глазьеў
Пра гэта паведамляе інфармацыйнае агенцтва УНІАН.
Паводле інфармацыі эканаміста, доля прыбытку, якую прадпрыемствы накіроўваюць на пагашэнне працэнтаў, ужо перавышае 100%. Такім чынам, прамысловы сектар Расіі функцыянуе сабе ў страту, лічыць ён.
«Пра якія тэндэнцыі эканамічнага развіцця пры гэтым кажа [кіраўнік Мінэканамразвіцця] спадар Улюкаеў, я не разумею. Сітуацыя ідзе ўразнос», — заявіў сенатарам дарадца прэзідэнта, перадае расейская служба ВВС.
Ён дадаў, што пры рэнтабельнасці ў машынабудаванні на ўзроўні 2% цяжка чакаць інвестыцыяў у сектар, паколькі грошы можна накіраваць на біржавыя спекуляцыі, дзе рэнтабельнасць вышэй у шмат разоў.
«Чаму сёння нашы дзяржбанкі не даюць крэдыты вытворчым прадпрыемствам? Таму што на валютным рынку 80% рэнтабельнасць. Валютныя спекулянты вытрымаюць ключавую стаўку і ў 20%, і ў 30% гадавых», — сказаў на заканчэнне ён.