Украіна. АТА за марыхуану?

Украінскія арганізацыі, якія выступаюць за легалізацыю марыхуаны, нечакана атрымалі новых саюзнікаў.

Гаворка пра ветэранаў баявых дзеянняў на ўсходзе Украіны і ахвяраў канфлікту. Шмат каму з іх, калі верыць прыхільнікам легалізацыі, дапамагае ўжыванне «травы». 

«Выкарыстанне медыцынскай марыхуаны для ваенных і мірных жыхароў, якія сталі ахвярамі ваенных дзеянняў на ўсходзе Украіны, з’яўляецца актуальным», — адзначаецца на сайце адной з арганізацый. Тут жа прыводзяцца словы аднаго з ветэранаў: «Мне 29 гадоў, і я ветэран АТА. Падчас выканання баявога задання я падарваўся на міне. Пазней мне правялі больш за 12 аперацый і ампутавалі нагу... Мне часам дапамагае марыхуана... Думаю, такое пачуццё ўласціва шмат каму, хто ваяваў на Данбасе. Яны паляць марыхуану, каб неяк супакоіць нервы».

З улікам таго, што ветэраны АТА ва Украіне — вельмі актыўная і ўплывовая сацыяльная група, іх меркаванне можа прымусіць улады пагадзіцца на рэформу. Важнай падзеяй у працэсе легалізацыі «траўкі» прыхільнікі разглядаюць вялікую канферэнцыю ў Харкаве, якая пройдзе ў красавіку. Плануецца, што на ёй будуць сфармуляваныя адпаведныя прапановы да ўрада.

Паводле ўкраінскай прэсы