Польшча прапануе ўвесці гандлёвую блакаду Расіі

На пасяджэнні Еўрапейскай рады Польшча хоча прапанаваць увесці гандлёвую блакаду Расіі. Пасяджэнне ЕР пройдзе ў чацвер у Бруселі.

На пасяджэнні Еўрапейскай рады (ЕР) Польшча прапануе ўвесці гандлёвую блакаду Расіі, у тым ліку закрыць парты для расійскіх караблёў. Пра гэта паведаміў прэм'ер-міністр Матэвуш Маравецкі, піша www.polskieradio.pl.

Кіраўнік польскага ўрада дадаў, што гандлёвы блок трэба дадаць у цяперашні пакет санкцый супраць Расіі:

— Польшча прапануе, каб да існуючага пакету санкцый дадаць гандлёвую блакаду. У тым ліку ў марскіх партах, забарону плавання суднаў пад расійскім сцягам. Таксама забарону гандлю на сушы. Дадатковае спыненне гандлю прымусіць Расію задумацца, ці не лепш спыніць гэтую жахлівую вайну.

У чацвер у Бруселі пройдзе пасяджэнне Еўрапейскай рады.