Ксяндзу Барку прысудзілі 10 дзён арышту за публікацыю выявы Цэслера «Стоп лукашызм»

3 снежня суд Расонскага раёна (Віцебская вобласць) пакараў каталіцкага святара з Расонаў Вячаслава Барка 10 сутак арышту. Гэтую інфармацыю пацвердзіў Свабодзе прэсавы сакратар Беларускай каталіцкай царквы Юры Санько.



Святар будзе адбываць прысуд у Наваполацку.

Ксяндза Барка судзілі за тое, што на сваёй старонцы ў Фэйсбуку ён размясціў працу мастака Уладзіміра Цэслера «Стоп лукашызм».

У сувязі з тым, што на малюнку прысутнічае выява нацысцкай свастыкі, публікацыю малюнка святаром расцэненая як дэманстрацыя нацысцкай сімволікі. Сёння ў Расонах адбылося другое судовае паседжаньне, на якім вынеслі прысуд паводле артыкулу 17.10 КоАП («Прапаганда і (ці) публічная дэманстрацыя, выраб і (ці) распаўсюд нацысцкай сімволікі ці атрыбутыкі»).

«Я патлумачыў, што я размясціў мастацкі твор славутага мастака Уладзіміра Цэсьлера „Стоп лукашызм“, а не нямецкую свастыку. Я супраць фашызму, камунізму, любога таталітарнага рэжыму. Гэты плакат я размясціў, паказваючы свой пратэст супраць гвалту ў краіне», — патлумачыў святар сваю пазіцыю.

Мастак Уладзімір Цэслер абурыўся трактоўкай следчым сваёй карціны і выступіў у абарону Вячаслава Барка.

«Я, Цэсьлер Уладзімір Якаўлевіч, сябра Беларускага саюзу мастакоў, габрэй, аўтар працы „Стоп лукашызм“, заяўляю, што выкарыстаны ў маёй працы вобраз мае прамую антыфашысцкую скіраванасць. Трактоўка гэтай працы ў якасці прапаганды або дэманстрацыі нацысцкай і фашысцкай сімволікі бязглуздая і абсурдная ў сілу прамой антыфашысцкай сутнасці гэтай працы».

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: