У Мінску прайшла акцыя з нацыянальнымі сцягамі (абноўлена)

На плошчы Незалежнасці прайшла акцыя Свята Незалежнасці, якую арганізаваў «Малады Фронт».

Каля 30 чалавек з бел-чырвона-белымі сцягамі ўтварылі ланцуг, які расцягнуўся ад плошчы да вуліцы Валадарскага, паведамляе Радыё Свабода. Актывісты раздалі мінакам каля 400 бел-чырвона-белых стужак. Міліцыянты пільна сачылі за акцыяй, здымалі ўдзельнікаў і амаль на ўсіх склалі пратаколы. Затрыманняў не было.

Сярод удзельнікаў былі Зміцер Дашкевіч, Павел Вінаградаў, Вольга Мікалайчык, Ніна Багінская, Максім Вінярскі, Леанід Кулакоў, Павал Пракаповіч.

Сустаршыня «Маладога Фронту» Зміцер Дашкевіч ацаніў акцыю станоўча, сказаў, што і тыя, хто прыйшоў падтрымаць Дзень Незалежнасьці, і тыя, хто праходзіў міма, засведчылі, што беларусы падтрымліваюць незалежнасць Беларусі і бел-чырвона-белы сцяг.

27 ліпеня 1990 г. Вярхоўны Савет БССР прыняў Дэкларацыю аб дзяржаўным суверэнітэце Беларусі.
Партал Naviny.by паведамляе, што яшчэ да пачатку акцыі супрацоўнікі міліцыі ў форме пачалі складаць у дачыненні да актывістаў пратаколы аб адміністрацыйным правапарушэнні і працягвалі гэта рабіць на працягу гадзіны. У адказ прадстаўнікі «МФ» заяўлялі, што не разумеюць рускай мовы і прасілі звяртацца да іх па-беларускі.