У кампаніі "Права выбару" заяўляюць аб праблемах з акрэдытацыяй назіральнікаў

У кампаніі "Права выбару" заяўляюць, што ў 43 выпадках назіральнікам за выбарамі дэпутатаў мясцовых саветаў не ўдалося атрымаць акрэдытацыю, прычым у большасці выпадкаў — па віне выбарчых камісій.



У прыватнасці, на ўчастку № 78 Голубеўскай выбарчай акругі № 26 па выбарах у Мінскі гарсавет назіральнік не змагла атрымаць акрэдытацыю 17 сакавіка ў 18.05, паколькі, паводле слоў прадстаўнікоў іншай камісіі, якая знаходзіцца ў тым жа будынку, камісія ўжо пайшла дадому, хаця тэрмін працы ўсіх камісій быў вызначаны да 19.00 у будныя дні.

У выбарчай акрузе № 11 па выбарах у Брэсцкі гарсавет два з трох выбарчых участкаў (№ 25 і 35) былі закрыты ў працоўны час.

Яшчэ "больш анекдатычная сітуацыя", паведамляюць у кампаніі, адбылася ў выбарчай акрузе № 21 па выбарах у гэты ж савет. На ўчастку № 71 члены ўчастковай камісіі "былі на сваім працоўным месцы, але кніга ўваходных дакументаў камісіі знаходзілася ў апячатаным сейфе, адчыніць які чыноўнікі не пагадзіліся, і на гэты раз назіральнік "Права выбару" таксама застаўся без акрэдытацыі".

"Ва ўсіх выпадках неабгрунтаванай адмовы ў акрэдытацыі дзеянні камісій будуць абскарджаныя", — падкрэсліваюць у кампаніі. У кампаніі "Права выбару" таксама паведамляюць, што ў першыя гадзіны датэрміновага галасавання 18 сакавіка на выбарах дэпутатаў мясцовых саветаў 654 назіральнікі кампаніі атрымалі акрэдытацыю на 309 выбарчых участках у 95 выбарчых акругах па ўсёй Беларусі і пачалі працаваць. 

У кампаніі "Права выбару" бяруць удзел сем структур: Беларуская партыя "Зялёныя", Партыя БНФ, Беларуская сацыял-дэмакратычная партыя (Грамада), кампанія "Гавары праўду", рух "За Свабоду", а таксама аргкамітэты па стварэнні партыі "Беларуская хрысціянская дэмакратыя" і Партыя свабоды і прагрэсу. belapan.com