10 ідэяў, як адзецца на Дзень Волі
Кожнае свята патрабуе адмысловы гардэроб: на Купалле шукаюць народныя строі, на Каляды і Новы год выцягваюць касцюмы Дзедаў Марозаў і Святых Мікалаяў, на Хэлоўін пераапранаюцца ў дэманаў і злыдняў. Радыё Свабода сабрала 10 варыянтаў для святочнага гардэробу на 25 сакавіка.
Гэтыя рэчы змогуць прыдацца як падчас шэсця, гэтаксама ў сяброўскай кампаніі ў бары за куфлем піва.
1. Інтэрнэт-крама «Stigmata Style
Інтэрнэт-крама «Stigmata Style» адмыслова да Дня Волі выпусціла саколкі і байкі з вялікім гербам БНР.
Stigmata Style — гэта адна з першы інтэрнэт-пляцовак у Беларусі, якая пачала прадаваць вопратку, посуд і розную сувенірную прадукцыю з беларускімі гістарычнымі
сімваламі, арнаментам ды знакавымі датамі для Беларусі.
Сярод прапановаў, якія зараз ёсць на сайце, гэта саколкі «Асобны атрад БНР», байкі да 500-годдзя бітвы пад Воршай, з выявай Вітаўта Вялікага ды іншыя.
2. LSTR
Яшчэ адна папулярная інтэрнэт-крама, адзенне якой будзе актуальным у Дзень Волі, гэта «LSTR Adzieńnie». За два гады працы брэнд выпусціў дзясятак унікальных рэчаў ды задзейнічаў у сваіх фотасэтах усіх зорак альтэрнатыўнай музычнай сцэны Беларусі, ад Міхалка да Вольскага.
Крама прапануе саколкі, худзі, кашулі і світшоты з разнастайнымі аўтарскімі «Пагонямі», некалькі відаў вышыванак, арнамент і крой для якіх распрацавала Наста Глушко, адзіны ў краіне афіцыйны эксперт ЮНЭСКА ў галіне нематэрыяльнай культурнай спадчыны.
3. Sakolka.by
Фэйсбук-крама «sakolka.by» да Дня Волі стварыла цэлы шэраг саколак, прысвечаных БНР.
А для сваёй калекцыі саколак «Асобны атрад БНР — ІІ» дызайнер Вадзім Пракопчык распрацаваў сваю філасофію, з якой можна пазнаёміцца тут.
4. Symbal.by
Крама «symbal.by» прапануе 25 сакавіка адзець як класічную саколку з «Пагоняй» Яўгена Куліка і Уладзіміра Крукоўскага, так і цішотку з ужо скандальнай «Вершніцай».
Некалькі дзён назад інтэрнэт-пляцоўка «symbal.by» аб’явіла пра адкрыцьцё офлайн-крамы ў мінскім гандлёвым цэнтры «Маскоўска-Венскі», дзе прапануе сапраўдныя вышыванкі, вышымайкі, а таксама саколкі і байкі, якія будуць добра пасаваць да Дня Волі, з воклічамі «Жыве Беларусь» і «Люблю Беларусь».
5. Суколка Патрыёта
Крама «Суколка Патрыёта», акрамя вялікага выбару цішотак з калюмнамі, шасціканцовым крыжом і «Пагоняю», прапануе стылёвыя бесболкі з нацыянальнымі сімваламі.
6. Honar
Брэнд адзеньня «Honar» анансаваў, што ў красавіку адчыняе свой шоўрум і прэзэнтуе новую калекцыю.
А пакуль на Дзень Волі дзяўчаты і хлопцы могуць адзець нешта з ранейшых калекцыяў брэнду.
7. Працуй пільна
Малады мінскі брэнд вулічнай вопраткі ды адзення «Працуй пільна» для ўсіх аматараў шэсцяў і мітынгаў прапануе шапкі, швэдры і курткі са сваіх калекцый «Час адкрываць сябе» і «Калі вы ёсьць...»
8. Беларусам
Інтэрнэт-крама «Беларусам» спецыялізуецца на вязаных шаліках, швэдрах, а цяпер і камізэльках. Засталося толькі выбраць — чырвоную ці белую, з Пагоняй ці арнамэнтам.
9. Традыцыйная вышыванка
Адзін з заклікаў пры падрыхтоўцы Дня Волі, які прагучаў упершыню ў гэтым годзе: «Надзяем вышыванкі, вышымайкі, народныя строі ці любое адзенне з арнаментам. Выцягвайце прыгожыя вышыныя кашулі і спадніцы з бабульчыных куфраў, набывайце ў майстроў ці крамах. Мы маем традыцыі ды любім сваё. Нацыянальнае адзенне вылучае і робіць нас адметнымі».
На сайце моўных курсаў «Мова нанова» зявіўся спіс з 38 прапановамі, дзе набыць ці замовіць вышыванку.
10. Свой малюнак
Калі хочацца быць адметным і ўнікальным, то можна раздрукаваць на саколцы ці байцы свой унікальны малюнак, плакат ці заклік.
Культурная пляцоўка «Арт Сядзіба» на сваім сайце апублікавала каталог з дзясяткам розных «Пагонь» у вектары і растры, якія можна вольна пампаваць і выкарыстоўваць у любых мэтах.
